Derfor forlét eg Senterpartiet
Populisme og kamp for særinteresser er ikkje sunt for politikken, uavhengig av kva farge det er på den.
Av Emil André Erstad, forfattar og kristendemokrat
Eg starta det politiske livet mitt i Senterpartiet. Foreldra mine er bønder og var partimedlemer i heile min oppvekst. Eg vaks opp i Senterparti-kommunen Radøy og identifiserte meg med kampen mot Oslo, målsaka, motkulturane, retorikken for småkårsfolk og den intense kjærleiken til alt som lukta distrikt og utkant.
Men så byrja eg å lytte litt etter kva som låg bak sakene, kva idear og prinsipp som var gjeldande. Eg høyrde mykje av det som har kome fram i den siste tids debatt om Senterpartiet.
