Arbeidarpartiet er mot kontantstøtte - men godtek kommunal kontantstøtte
Fleire kommunar tilbyr lokal kontantstøtte. Arbeidarpartiet er prinsipielt mot ordninga. Men i Hå kommune går partiet ikkje til val for å fjerne tilbodet.
Nokre av kommunane som tilbyr kommunal kontantstøtte krev at barnet ikkje brukar barnehage, andre tillet kombinasjonar.
Gorm Kallestad
KrF har i fleire kommunar klart å oppretthalde rause, lokale ordningar med ekstra kontantstøtte - ofte med støtte frå Arbeidarpartiet, som i prinsippet er mot slik støtte.
– Eg skulle ønskje at me heller brukte pengane på å styrkje barnehagen, få inn fleire pedagogar og fleire vaksenpersonar, seier Tone Elin Berge.
I dag er ho gruppeleiar for Arbeidarpartiet i Hå kommune i Rogaland, men vonar å ta steget opp og bli ordførar etter valet i september.
