Under Senterungdommens landsmøte i helga vedtok ungdomspartiet følgande:
«Det skal vera obligatorisk for skulane, både i grunnskule og vidaregåande, å tilby kristen skulegudsteneste».
Politisk utval hadde foreslått at deltaking på kristen skulegudsteneste skulle vera obligatorisk, men dette fekk dermed ikkje fleirtal.
Vårt Land har tidlegare omtala forslaget om å gjera deltakinga obligatorisk.
Kompromiss-forslaget som vann fram, kjem frå Senterungdommen Møre og Romsdal. I grunngjevinga skriv Møre og Romsdal at:
«Me ynskjer ikkje å tvinge fram at ein skal gå i kyrkja, og har meir lyst at skulane skal tilby skulegudsteneste».
Landsmøtet valde også Nils Forren til ny leiar. Han tek over etter Andrine Hanssen-Seppola.
Fleirtalet i valkomiteen hadde innstilt Erik Lillebakken som ny leiar, medan Nils Forren var innstilt av eit mindretal i komiteen.
Nils Forren kjem frå Heim kommune i Trøndelag. Han har tidlegare gjort seg bemerka med ein kronikk om kor mykje han misliker Arendalsuka.
