Fredag startar dei 33. olympiske sommarleikane i Paris. Medan heile verda kjem til å følgje spent med på idrettsprestasjonar og medaljar, har nokon andre mål for OL.
– Definitivt! svarar Arvid Aasen på spørsmålet om han trur Paris under OL er ein god stad for misjonering.
Aasen er pinsevenn og misjonær, og har budd i den franske hovudstaden saman med familien i ti år. Då Vårt Land pratar med han er han på veg tilbake til Paris etter ferie i Norge.
Det er venta at rundt 15 millionar menneske kjem til hovudstaden under OL, noko Aasen ser på som ei god moglegheit for han sjølv og dei andre misjonærane.
– Når så mange menneske frå heile verda er i byen, er det også store moglegheiter for oss, seier Aasen, og understrekar at han er vane med å misjonere i gatene i Paris.
Tidlegare i år skreiv Vårt Land om at Aasen og misjonsorganisasjonen han jobbar for ville starte bibelskule utanfor Paris. Her sa Aasen også at han meiner dei fleste katolikkar ikkje er kristne, noko han fekk kritikk for. 64,5 prosent av franskmenn er kristne, ifølgje oppslagsverket Britannia, og det største religionssamfunnet i landet er Den katolske kyrkje.
Søkjer ei større meining
For berre nokre år sidan fortel Aasen at han opplevde å få trugslar og at folk heiv visittkorta dei delte ut etter han. Men dette har endra seg.
– Er folk som er i byen for å sjå OL opne for bodskapen dykkar, trur du?
– Eg opplever at folk stort sett har blitt meir opne, og det trur eg gjeld dei tilreisande under OL også. Når det ikkje er OL, er det ofte folk som stoppar opp for å ta ein prat, ifølgje Aasen, som då plar å spørje folk om kvifor dei stoppar opp og vil høyre på bodskapen deira.
– Svaret eg ofte får då er at grunna uroa i verda og ei utvikling som går i feil retning, søkjer fleire ei større meining i livet, seier han.
QR-kode og eit spørsmål
Korleis går ein som misjonær fram når ein skal stoppe folk på gata i ein av Europas største byar?
– Me går på gata, ein til ein, og gir ut visittkort med eit bibelvers på kvar side. På desse visittkorta er det ein QR-kode som fører til nettsida vår, slik at dei som vil kan gå inn og lese meir om oss, fortel han.
Aasen har prøvd ulike tilnærmingar når han er ute på gata, og har funne eit spørsmål han synest fungerer godt.
– Eg byrjar ofte med å spørje «veit du at du er elska?», og det fungerer ofte. Elles spør eg om det er greitt at eg gir dei eit visittkort, men eg har prøvd mange variantar.
50.000 visittkort og lange dagar
– Har de sett dykk eit mål på kor mange menneske de vil nå, og korleis målar de eventuelt dette?
– Me har bestilt inn 50.000 visittkort og me er åtte misjonærar, så me har eit mål om å bli kvitt dei korta. Når me no gir ut visittkort med QR-kode på, kan me sjå kor mange som har nytta denne QR-koden for å komme inn på nettsida vår seinare.
Dagane som misjonær kan vere lange, og Aasen seier at planen er å drive misjonsarbeid under heile OL. Han fortel korleis ein dag med misjonering under OL kan sjå ut.
– Me må gå oss litt til i starten. Morgonane byrjar med bøn og fellesskap, så må me ut å finne områda som er godt befolka og utan for mykje rørsle. Lunsj- og middagstider er ofte gode tider å vere ute på. Eg ser for meg at det blir lange dagar og kveldar, men me tek dag for dag, det er viktig å ta vare på oss sjølve også, seier Aasen.
Ingen sportsidiot
– Skal de sjå på OL då?
– Nei, eg er ikkje interessert i OL. Eg er generelt veldig lite interessert i sport. Moglegvis ser eg litt handball, men utover det kjem eg nok ikkje til å følgje med, seier han.
