Ola Ødegaard døydde på Landmo sjukeheim på Dokka på måndag. Det skriv NRK.
Ødegaard var 81 år gammal.
– Ingen har gjort meir for taparane enn han. Utan hans endelause kamp hadde mange fått eit fælt liv.
Det seier Tormod Hilmen, som har kjent Ødegaard sidan 80-talet.
Tøff barndom
I 1993 oppretta Ødegaard stiftinga Rettferd for taperne, og var generalsekretær her fram til han gjekk av med pensjon i 2015.
Stiftinga jobbar for utsette menneske og deira rettar, særskilt i møte med styresmakter og institusjonar.
Sjølv hamna Ødegaard i fosterheim som gut, og seinare blei han plassert på ein spesialskule for evneveike. Dette har han mellom anna fortalt om i boka «Ingen barndom».
Her fortel han også om omfattande omsorgssvikt.
Ødegaard var mange gonger i Vårt Land sine spalter med innlegg der han sette fokus på rettane til barn utsett for overgrep, omsorgssvikt og vald.
Ola Ødegaard blei i 2005 tildelt Kongens fortenestmedalje i gull for arbeidet.
– Redda liv
Hilmen er ein av dei som hadde ein tøff start på livet, og som fekk hjelp av Ødegaard og stiftinga hans.
– Han opna dørene for eit meir verdifullt liv, seier Hilmen, som mellom anna fortel at det var Ødegaard som hjelpte han med å få økonomisk erstatning frå stat og kommune.
Hilmen har tidlegare fortalt sin historie i Vårt Land.
Han seier Ødegaard var ein rettferdig mann som det var enkelt å få tillit til.
– Det er veldig trist at han har gått bort. Det blir eit tomrom. Han har redda livet til veldig mange menneske.
– Alt det han har gjort for oss blir aldri gløymt. Ingen kan ta den stafettpinnen vidare, meiner Hilmen.
Oppfordra kyrkja
Ødegaard engasjerte seg også i saker knytt til ulike kyrkjesamfunn.
I 2008 talte han under ei «tapargudsteneste» i Vålerenga kyrkje, og der var tala til kyrkja klar:
– Den kyrkja som har fått forsoninga som oppdrag burde ikkje nøle med å be alle som føler at dei har blitt offer for ei kyrkje som ikkje bryr seg om tilgjeving og forsoning.
Han utfordra også kyrkja til å ta opp kampen for de som er sett utanfor det gode fellesskapet.
Dødsfallet kom brått på
– Me kjenner Ola Ødegaard som ein person som tok i dei sakene som ingen andre ville ta i. Å gje dei stemmelause ei stemme var hans store livsmisjon, seier Knut Storberget, statsforvaltar i Innlandet, til NRK.
I den same artikkelen seier kona til Ødegaard, Anne Marie Ødegaard, at dødsfallet kom brått på, etter at ektemannen fekk ein lungebetennelse.
Gravferda skal vera i Østsinni kyrkje i Dokka fredag neste veke.
