FHI: 40 prosent nedgang i hjarteinfarkt på ti år

– Positive endringar i risikofaktorar som blodtrykk, kolesterol og røyking forklarer ein stor del av nedgangen i hjarte- og karsjukdommar, seier overlege Rune Kvåle i Hjarte- og karregisteret ved Folkehelseinstituttet (FHI) i ei pressemelding.

I pandemiåret 2020 vart det registrert færre pasientar enn forventa med diagnosane akutt hjarteinfarkt, atrieflimmer og hjartesvikt, men i 2021 var talet på personar registrert med hjarte- og karsjukdommar tilbake til forventa nivå.

Årsaka til at talet på personar med atrieflimmer framleis er noko lågare enn forventa ut frå åra før pandemien, er ikkje kjende.

– Noko av nedgangen kan sannsynlegvis forklarast av at færre personar utan symptom har fått påvist denne diagnosen også i 2021, som følgje av færre behandlingar eller innleggingar for andre tilstandar på sjukehusa i 2021, ifølgje FHI.

Statistikken frå Hjarte- og karregisteret viser at totalt 369.420 pasientar vart registrerte i Hjarte- og karregisteret i 2021, og 13.643 personar fekk diagnosen akutt hjarteinfarkt. Av desse var 35 prosent kvinner, og 11.548 av pasientane hadde ikkje vorte registrert med diagnosen dei fem førre åra.