Ungarn kallar Ukrainas ambassadør inn på teppet
Ungarn har kalla Ukrainas ambassadør inn på teppet i protest mot at ukrainske leiarar fleire gonger har kritisert statsminister Viktor Orban.
Orban er mellom anna kritisert for å ha innteke ei «nøytral» haldning til Russlands invasjon, og dessutan for å ha hatt ein antiukrainsk tone.
Innkallinga kjem få dagar etter at partiet til Orban vann valet, slik at han kan halde fram som statsminister. Den nasjonalkonservative leiaren har lenge vore rekna som president Vladimir Putins næraste allierte i EU.
Annonse
– Det er på tide at ukrainske leiarar held opp med fornærmingane mot Ungarn og anerkjenner viljen til det ungarske folket, skriv Ungarns utanriksminister Peter Szijjarto på Facebook.
Ukrainas president Volodymyr Zelenskyj har mellom anna sagt at Orban har mista æra si som følgje av banda til Putin.
Ungarn vil ikkje la våpen til Ukraina passere gjennom deira territorium. Landet har førebels òg sagt nei til å innføre eit importforbod mot russisk olje og gass.
