– Feil eg gjorde for 15 år sidan skuggar over jobben eg skal gjere i dag, opna Hadia Tajik på pressekonferansen der ho melde sin avgang i dag.
Arbeids- og integreringsministeren måtte be om å få gå av etter at fleire saker knytt til bruk av pendlarbustad har rulla i media gjennom fleire veker.
– Den einaste som har skine i Støre si regjering har vore Tajik. Og så blir også ho henta inn av pendlarbustadsaka, seier Svein Tuastad til Vårt Land.
Noregsrekord i dårleg start
Han er førsteamanuensis i statsvitskap ved Universitet i Stavanger, og valforskar. Han kallar no dei første månadane av Støre sitt regjeringsprosjekt «ein Noregsrekord i dårleg start».
– Støre slit med å få gjennomføre politikken han har lova å levere på. Kriser som den siste koronabølgja, straumkrisa, og no krig i Ukraina, gjer at han aldri kjem i gang. Og no mistar han også den eine av statsrådane hans som verkeleg har lukkast, seier Tuastad.
– Finnast det nokon historisk parallell til starten som Støre har hatt?
– Det må vere Jagland. Han byrja veldig dårleg, seier Tuastad, og legg til:
– Og det fortsette dårleg, og.
Oppbygd truverdskapital
Det er likevel ikkje sikkert at Tajik er ferdig i toppen av norsk politikk som følgje av dette, understrekar Tuastad.
– Eg tru det er mogleg for henne å komme tilbake. Det er nesten meir så eg lurer på om ho ønskjer å komme tilbake, eller om ho er blitt lei av politikken.
Sjølv om pendlarbustadsaka har skapt mykje negativ merksemd for Tajik, så meiner Tuastad at ho framleis har litt å gå på.
– Tajik som politikartype er ryddig. Det kjem ho til gode no. Ho har mykje opparbeidd truverdskapital på kontoen enno, trur han.
[ Berit Aalborg: «Hadia Tajiks avgang er et av de aller største stjernefallene i norsk politikk» ]
