Sp-ordførar jublar – no får ho ikkje lenger lov å kutte i sosialhjelpa

– Dette er heilt riktig, rett og slett, seier ordførar i Midt-Telemark Siri Blichfeldt Dyrland (Sp).

Hennar kommune har ein svært anstrengt økonomi, og føler seg pressa til å avkorte sosialhjelpsutbetalingar til barnefamiliar mot barnetrygd.

Tidlegare i haust gjekk ho ut i Vårt Land og bad si eiga regjering innføre eit forbod mot praksisen. Senterpartiet har programfesta eit slikt forbod, men dette kom likevel ikkje med i regjeringsfråsegna som partiet forhandla fram saman med Arbeidarpartiet i Hurdal.

[ Slik løste de harde budsjett-floker: SV er nå sikre på tøffere utslippskutt ]

Til slutt vart det i staden SV som gav Sp-ordføraren bønesvar.

I budsjettsemja mellom regjeringspartia og SV ligg det inne eit krav om at sosialtenestelova skal endrast slik at barnetrygd skal haldast utanfor sosialhjelpa.

Bekymra for om det følgjer pengar med

Sjølv om Dyrland jublar over at SV fekk inn dette punktet i budsjettforhandlingane, så er ho likevel litt uroleg for økonomien i det.

– Viss det ikkje følgjer med pengar, så blir det vanskeleg. Eg skjønar at dette er heilt underordna for organisasjonane som har jobba for dette, men det betyr mykje for oss som har ein veldig mager økonomi, seier ho.

[ Bønn frå Sp-ordførar: Nekt oss å kutta i sosialhjelpa ]

Prislappen for å slutte med avkortingspraksisen er på rundt tre millionar kroner. For Midt-Telemark, som står i fare for å hamne på den frykta Robek-lista, er dette mykje pengar.

Kommunar som hamnar på denne lista blir sett under delvis administrasjon under Statsforvaltaren.

Frykta for å hamne på denne lista er ein av grunnane til at kommunen føler seg pressa til å kutte i sosialhjelpa. Men Midt-Telemark er langt frå aleine om å gjere dette. To av tre norske kommunar kuttar i sosialhjelpa til familiar som får barnetrygd.

Glede i Redd Barna

– På vegner av titusenvis av barn i Noreg som lever under fattigdomsgrensa, jublar vi i Redd Barna i dag, skriv dei i pressemelding.

Dei kallar praksisen uforståeleg. I haust har 20.000 skrive under på eit opprop frå organisasjonen for å få på plass eit forbod.

– Med dette ryddar SV opp i ein stor urett, skriv dei i pressemeldinga.

– I alt for mange år har dei fleste kommunane i Noreg trekt pengar frå familiar som ikkje har råd til å fylle opp kjøleskapet eller kjøpe nye fotballsko til barna.

[ Raudt om barnetrygd: Me ventar at SV set hardt mot hardt ]

– Burde vore med frå starten

Sp-ordførar Dyrland er litt skuffa over at regjeringa partiet hennar er del av trengde hjelp frå SV for å sette ein stoppar for praksisen.

– Det er litt synd at måtte skje på denne måten. Det burde vore med frå starten.