SV vil sikre transmenn eggdonasjon

– Det er ikkje berre tenkte tilfelle dette handlar om, men reelle personar som får nei i dag, fortel stortingsrepresentant Nicholas Wilkinson (SV) til Vårt Land.

Han snakkar om retten til eggdonasjon for transmenn og ikkje-binære. Han har engasjert seg sterkt i saka og har fått helseministeren til utarbeide eit forslag til endring av bioteknologiloven.

Wilkinson er utgåande SV-representant, og får ikkje følgt lovarbeidet vidare i det nye Stortinget.

I Fri, foreininga for kjønns- og seksualitetsmangfald, er leiar Inge Alexander Gjestvang glad for innsatsen til SV og Wilkinson.

– Me vonar at alle typar kjønn kan bli foreldre, seier han til Vårt Land.

Han peikar på at dei to gruppene som loven i dag stenger for, har éin type kjønnsceller, men eit anna kjønnsuttrykk.

Me vonar at alle typar kjønn kan bli foreldre

—  Inge Alexander Gjestvang, leiar i Fri

To definisjonar

Med transmann og ikkje-binær meinest:

• Ein ikkje-binær person er ein som ikkje reknar seg som korkje mann eller kvinne.

• Ein transmann er ein person som er fødd som kvinne, men som har mannleg kjønnsidentitet. Personen kan ha gått gjennom ei kjønnsstadfestande behandling.

[ Heimhenta leigesoldat kuppa demokratisk valt president ]

Frys ned egg

Stortingsfleirtalet, Ap, SV og Frp, mjuka opp bioteknologiloven i fjor. Eggdonasjon til par blei lovleg i Norge frå 1. januar i år.

Men loven har framleis avgrensingar:

Partnardonasjon av egg gjeld berre likekjønna par som består av to kvinner som blei fødde som kvinner.

Egg som trans-menn eller ikkje-binære kan ha fryst ned, kan ikkje bli brukte fordi dei er trans eller ikkje-binære.

«Er statsråden enig at det strider mot likestillings- og diskrimineringsloven?», spør Wilkinson i eit skriftleg spørsmål til helseminister Bent Høie (H).

Let Stortinget avgjere

Regjeringa blei overkjørt av Frp, Ap og SV i bioteknologistriden. Høie skriv i svaret at «likestillings- og diskrimineringsloven § 6 forbyr diskriminering på grunn av blant annet kjønn, kjønnsidentitet og kjønnsuttrykk».

Men Høgre-statsråden let det bli opp til Stortinget å avgjere om dagens lov er diskriminerande:

«Dersom Stortinget mener den nye bestemmelsen bør gjelde uavhengig av juridisk kjønn for å unngå brudd med likestillings- og diskrimineringsloven, bør bestemmelsen endres».

Han skriv vidare at Helsedepartementet kan «gi lovteknisk bistand».

---

Bioteknologiloven

• Stortinget vedtok ny bioteknologilov i fjor vår. Solberg-regjeringa ønskte ein restriktiv lov, men fleirtalet, Ap, SV og Frp, gjekk saman om ei oppmjuking.
• Mellom anna blei eggdonasjon og assistert befruktning for einslege lovleg i Norge.

---

Ei juridisk kvinne

I svarbrevet utdjupar Høie dagens praksis:

Retten til eggdonasjon for likekjønna kvinnelege par gjeld berre par «der begge er født som kvinner med livmor og minst den ene har medisinsk mulighet til å bære frem barnet».

Transmenn har ikkje rett til å donere egg til partnaren, fordi det ikkje er tale om eit likekjønna kvinneleg par.

Ikkje-binære har rett til partnardonasjon dersom begge i paret har juridisk kjønn som kvinne.

Par der ein eller begge er ikkje-binære og begge er registrerte som kvinner, vil ha rett til partnardonasjon.

[ Overlege etterlyser mer penger til eggdonasjon-tilbud ]

Forslag frå departementet

SVs Wilkinson takkar for tilbodet om lovteknisk hjelp frå Høies departement, og ber i eit nytt skriftleg spørsmål om slik hjelp:

«Jeg ber om lovmessig bistand for at partnerdonasjon skal gjelde uavhengig av juridisk kjønn.»

Bent Høie og Helsedepartementets lovkunnige juristar legg så fram dette forslaget til lovendring:

«Ved assistert befruktning til personer som har endret juridisk kjønn (...) skal personens fødselskjønn legges til grunn (...) dersom personen ønsker det.»

Juridisk kjønn

I det andre svarbrevet til Wilkinson skriv helseminister Høie:

«Ved en eventuell endring for partnerdonasjon, bør det derfor vurderes å gjøre anvendelsen av alle bestemmelsene i bioteknologilovens regler om assistert befruktning uavhengig av juridisk kjønn.»

Nicholas Wilkinson legg lovarbeidet i hendene til partiets nye stortingsgruppe. Helseminister Bent Høie på si side er ferdig som statsråd, han skal bli statsforvaltar i Rogland.

Inge Alexander Gjestvang i Fri vonar SV tek saka med seg inn i forhandlingane om ny regjering.