Draumen om å bli gjenforeint med familiemedlemmer er sett på vent for mange. På grunn av korona er det over eit års ventetid på intervju i slike saker hjå politiet.
Det får Akhenaton Oddvar de Leon, leiar i organisasjonen OMOD, til å reagera.
– Folk skal ha lik tilgang på offentlege tenester. Det er urimeleg at politiet bruker korona som unnskylding.
OMOD jobbar for å ivareta rettstryggleiken til minoritetar og motverka rasisme i Noreg.
Ventetida varierer stort mellom politidistrikta. Oslo er verstingen, med ei ventetid på heile 16 månader. Kortast ventetid har Finnmark, med tre månader.
[ På mobilen tikka det inn drapstruslar. Familien hadde funne ut at Mina ville gifta seg med ei jente. ]
– Folk er redde
To av dei som ventar på politiet, er Mina og Sara. Vårt Land har fortalt historia til det syriske kjærasteparet, som drøymer om å gifta seg i Noreg.
Sara har opphald i Noreg, medan Mina bur i Syria. Mina har søkt om trulovingsvisum, som vil gje henne lov til å koma til Noreg for å gifta seg med Sara.
Etter at familien til Mina avslørte planane, har ho måtte leva i skjul, i frykt for sitt eige liv. Likekjønna forhold kan bli straffa med fengsel i Syria.
Mina har fått avslag frå UDI på søknaden, men Sara skal til intervju hjå politiet som skal undersøka saka nærare. På grunn av den lange ventetida, veit ho ikkje når intervjuet blir.
Statsministeren har møte om nasjonale interesser på internett. Kvifor kan ikkje politiet gjera det same?
— Akhenaton Oddvar de Leon
– Mange har det som Sara og Mina. Folk er redde, dei har sine kjære i eit anna land der det er krig. Nokon har venta i fleire år på gjenforeining. Ventetida slit dei ned psykisk og skaper utryggleik, seier Akhenaton Oddvar de Leon.
Ber politiet tenka utanfor boksen
De Leon i OMOD meiner Politiet må vurdera nye metodar for å korta ned ventetida.
– Dei kan gjera videointervju på nett eller overføre sakene til andre politidistrikt som har kortare ventetid. Statsministeren har møte om nasjonale interesser på internett. Kvifor kan ikkje politiet gjera det same? Dei kan ta opp samtalen og sjå den i opptak for å analysere ansiktsuttrykk, om det er det dei vil.
Han meiner å sjå eit paradoks i måten myndigheitene handterer innvandring og utvisingar.
– Samstundes som det er lang ventetid på intervju i familiegjenforeining, er det fullt trøkk på utvisingsfeltet. Myndigheitene held framleis på med å fatta utvisingsvedtak, og politiet kastar framleis folk ut av landet.
I 2020 tvangsreturnerte politiet 10.041 personar utan lovleg opphald frå Norge i 2020. Det var ei auke på 142 prosent samanlikna med året før, og grunnen til auka var brot på smittevernlova.
– Eg stiller meg spørsmålet: Brukar myndigheitene korona som ei unnskyldning for å setja innvandring på staden kvil? Det er val i år og innvandring er ei betent politisk sak. Det ser bra ut for politikarane om det er lågare tal på folk som kjem til Noreg og mange blir utvist, seier de Leon.
[ Verdidebatt: Vi må huske hvorfor Pride eksisterer. ]
Justisminister Mæland må gje svar om kø
Advokatfullmektig Ida Tønnessen representerer Mina for advokatfirmaet Schjerven Hansen.
Ho har sendt fleire e-postar til Øst politidistrikt og utfordra dei på den lange ventetida i intervju på familiegjenforeining.
– Eg meiner politiet må vurdera om ventetida bryt med artikkel 8 i Den europeiske menneskerettskonvensjon. For dette går ut over retten til familieliv. Ventetida råkar ikkje berre Sara og Mina, men også mange andre.
Nicholas Wilkinson i SV har tidlegare engasjert seg i historia til Sara og Mina.
No stiller han eit nytt skriftleg spørsmål til justisminister Monica Mæland (H). Han skriv at ventetida er uakseptabel lang og spør kva Mæland vil gjera for å sikra at personar raskare får koma på intervju.
Wilkinson leverte spørsmålet fredag førre veke, og Mæland skal svara innan seks virkedagar.
Politiet: Ingen andre alternativ enn fysisk oppmøte
Saka til Mina sorterer under Øst politidistrikt.
Merete Beck, leiar av utlendingsseksjonen i politidistriktet, peikar på smittesituasjonen i området.
– Det er lang saksbehandlingstid på intervjusaker grunna smittesituasjonen i Viken fylke og innførte smittevernsrutiner hjå politiet. Med lågare kapasitet til å gjennomføra intervju, aukar dessverre ventetida. Per i dag har me ingen annan mogelegheit enn å gjennomføra intervju ved fysisk oppmøte, skriv ho i ein e-post til Vårt Land.
Vårt Land har også spurt politiet om dei vurderer alternativa som OMOD tek opp, som å flytta intervju til andre politidistrikt eller gjera intervju via nett. Desse spørsmåla er vidaresendt Politidirektoratet, som førebels ikkje har svart.
---
Familiegjenforeining
- Familiemedlemmer som ufrivillig er atskilt kan busette seg saman i Norge gjennom familiegjenforeining.
- Lova har mange krav og unntak som skal hindra misbruk av ordninga og redusere risiko for tvangsekteskap.
- Folk med permanent opphald må ha arbeidd eller studert i Noreg i fire år og vera over 24 år for å søka familiegjenforeining.
Kjelde: Store norske leksikon
---