Noreg på botnen i ny kåring

Nordmenn er vane med å hamna på pallen når verdas beste land skal kårast. Noreg gjer det skarpt på likestilling og menneskeleg utvikling, og har nokre av dei lukkelegaste innbyggarane i verda.

Men på ei internasjonal rangering hamnar Noreg på jumboplass: På den såkalla Sustainable Development Index. Nye tal kom denne veka, og her hamnar Noreg på 158.-plass.

Indeksen måler berekraftig menneskeleg utvikling. Berre seks land gjer det dårlegare enn Noreg på denne indeksen: Kanada, USA, Australia, Dei sameinte arabiske emirata, Kuwait og Singapore.

[ Pastorar ønsker grønt skifte ]

Utvikla land øydelegg kloden

Indeksen The Sustainable Development Index (SDI) er utvikla av antropologen Jason Hickel. Han laga indeksen som ein reaksjon på det han meiner er svakheiter ved den meir velkjente indeksen Human Development Index (HDI).

HDI blir også kalla FNs indeks for menneskeleg utvikling. I tillegg til å måla det økonomiske nivået på velstand, tek HDI også med sosiale faktorar, som forventa levealder og utdanningsnivå.

Jason Hickel anerkjenner HDI som «eit viktig steg i retning ei meir fornuftig måling av utvikling», men er kritisk til at indeksen ikkje tek noko omsyn til jordklodens toleevne. Tvert om er det ofte rike land som bidreg mest til klimaendringar og naturøydeleggingar, som toppar HDI-indeksen.

Derfor laga Jason Hickel SDI-indeksen. Den baserer seg på FNs HDI-indeks, men legg til to nye faktorar: CO₂-utslepp og materielt fotavtrykk.

CO₂-utsleppa er rekna ut etter kor mykje kvart land slepp ut - så Noregs olje- og gasseksport blir ikkje rekna som «norske» utslepp. Materialbruken måler det økologiske fotavtrykket ved å bruka materiale som biomasse, mineral, fossile brennstoff og byggemateriale.

Noreg på femte plass i materielt fotavtrykk

På SDI-indeksen gjer Noreg det godt både på økonomisk velstand, forventa levealder og utdanningsnivå.

Men, me gjer det desto dårlegare på indikatorane som måler kor godt me tek vare på planeten: Noreg er på ellevte plass i CO₂-utslepp per innbyggar og på femte plass på materielt fotavtrykk per innbyggar.

Det gjer at Noreg er sikra 158.-plassen på kåringa.

Jason Hickel skriv i ein forskingsartikkel at Noreg er blant landa som dominerer på HDI-indeksen, men som fell til botn på SDI-indeksen på grunn av vårt store økologiske fotavtrykk.

Han utfordrar vidare ideen om at land må vera rike for å ha ei høg grad av menneskeleg utvikling. Han peikar på at land som Helles, Chile og Portugal har høgare forventa levealder enn USA, sjølv om dei berre er halvparten så rike.

Får lågare plassering på ny FN-indeks

I fjor kom FN med ei ny variant av HDI-indeksen som også tek opp miljø og klima.

Den er kalla PHDI og baserer seg på HDI-indeksen, men har lagt til bokstaven «P» for Planetary pressures-adjusted. Den indeksen skal også fanga opp miljøavtrykket til dei ulike landa.

Det skapte stor merksemd då Noreg hamna på 16.-plass på denne lista i desember i fjor.

TV2 melde at Noreg «stuper på prestisjeliste». Faktasjekkarane i Faktisk.no påpeika at det er feil, sidan PHDI er ein ny indeks. Noreg er framleis på første plass på HDI-indeksen.

Likevel: To nye kåringar utfordrar Noreg sin tittel som verdas beste.

[ Gjenbruk og reparasjoner kan skape 20.000 jobber ]