Nyheter

Avviser betaling for egg

Striden rundt eggdonasjon er ikkje over om Høgre seier ja. SV seier tvert nei til at kvinner som donerer egg skal få betalt – og partiet stiller strenge krav til donasjon.

Nicholas Wilkinson er helsepolitisk talsmann i SV – og tindrande tydeleg:

– SV ønskjer ikkje at kvinner skal bli betalt for drive eggproduksjon. Difor seier SV ja til eggdonasjon, men berre med overskotsegg, altså egg som blir til overs i samband med prøverøyrsbehandling, forklarar han.

– Kva meiner SV om kompenasjon til kvinner som donerer egg?

– SV seier nei til kompensasjon, vi ønskjer ikkje eit sterkt økonomisk press mot økonomisk dårleg stilte kvinner for at dei skal bli eggprodusentar.

LES MEIR Donerer egg av nestekjærleik

Rådråd

Standpunktet SV har landa på er det same som fleirtalet i Bioteknologirådet har konkludert med. Då rådet fekk i oppdrag av Helsedepartementet å gå gjennom dagens bioteknologilov, sa 9 av 15 medlemmer ja til eggdonasjon, på vilkår:

«De donerte eggene er overskuddsegg fra IVF-behandling etter at slik behandling er avsluttet.»

IVF står for in vitro-fertilisering, såkalla prøverøyrsbehandling. Her blir fleire tusen sædceller tilsett ei eggcelle i ei skål i laboratoriet, og så blir befrukta egg sett inn i kvinna.

Kartlegging

Vårt Land fortalte i går om studien som fortel kven dei er og kvifor dei gjev frå seg egg, dei kvinnene som i ei lang rekkje land i Europa donerer egg. 22 land seier ja. Norge, Tyskland, Sveits og Italia seier nei.

Studien fortel at donorane er både studentar, arbeidsledige og kvinner i full jobb, og at nesten halvparten gjer det i rein nestekjærleik – og at ein av tre er motivert av ein kombinasjon av altruisme og økonomisk kompensasjon. Spennet på kompensasjonane er stort; frå ingenting i Frankrike til 2.000 euro i Belgia – eller nesten 20.000 kroner.

Påkjenning

I helga skal Høgre avgjere eggdonasjonsstriden i partiet. Sjølv om fleirtalet seier ja til liberalisering av bioteknologilova, og med det styrkar fleirtalet for eggdonasjon på Stortinget, vil det bli nye kampar i Stortingets helsekomité fram til biolovinnstillinga må vere ferdig 8. mai.

Av partia som seier ja til eggdonasjon, er SV først ute med å avklare standpunktet om betaling – eller kompensasjon, som det heiter. Det er nemleg ulovleg å selje kroppsdelar.

Kvinner som skal donere egg må først gå gjennom to til fire veker med hormonbehandlingar, noko som er ei påkjenning for kroppen. I samband med uttaket av egg er det ein medisinsk risiko, donor kan oppleve blødingar og bli ramma av infeksjon.

LES MEIR: For kvar boks sæd får donorane 250 kroner 

Dobla

For å motivere kvinner til å bli donorar, opererer fleire land med kompensasjonar. Direktør Ole Johan Borge i Bioteknologirådet hentar fram dømer frå Sverige som viser at storleiken på kompensasjonen påverkar tilstrøyminga av donorar:

– I Sverige er det lena, eller fylka, som eig sjukehusa. Dei som tilbyr den lågaste satsen, rundt 4.000-6.000 svenske kroner, slit med å få donorar. Men då Skåne len auka kompensasjonen til 11.000 kroner forsvann ventelistene, for donorane strøymde på, fortel han.

Ventetid

Skånes motiv for å auke kompensasjonen var å kutte ned på ventetida. Kvinner som venta på donoregg sto to år i kø. Auken førte til at ventetida kom ned i åtte månader.

Helsingborgs Dagblad melder at også høgtløna kvinner blei donorar, for kompensasjonen dekte tap av inntekter då dei måtte ta fri ved uttak av egg.

I fjor haust ønskte den raudgrøne leiinga i lenstinget å halvere kompensasjonen, men lei nederlag då dei borgarlege partia, saman med Sverigedemokraterna, røysta ned forslaget. Halvering var eit «absurd» forslag, sa nestleiar Gilbert Tribo i helse- og omsorgskomiteen i lenstinget. Han representerer Liberalerna.

Dobla

På to år, frå 2012 til 2014, blei talet på eggdonorar i Skåne dobla, opp til 49 kvinner.

Les mer om mer disse temaene:

Bjørgulv K. Bjåen

Bjørgulv K. Bjåen

Bjørgulv K. Bjåen er journalist i nyhetsavdelingen i Vårt Land.

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter