Gjev éin million til ulovleg busetjing

Vesle julaftan fatta FN eit historisk vedtak. For første gong sidan 1979 vedtok Tryggingsrådet ein resolusjon som fordømte Israels busetjingspolitikk.

USA valde ikkje å støtte Israel som vanleg ved å leggje ned veto – dei nøgde seg med å avstå frå å røyste.

Resolusjonen krev full byggjestopp i dei ulovlege busetjingane på Vestbreidda, som Israel okkuperte under Seksdagarskrigen for 50 år sidan.

Solidaritet

Vedtaket i FNs tryggingsråd provoserte norske Israels-vener i organisasjonen Karmel-Instituttet. I vel 20 år har dei samla inn pengar til israelske busetjarar i Alonei Shilo. No ville dei samle inn ein solidaritetsmillion, som eit handslag til nybyggjarar Karmel-Instuttet seier bur på bibelsk grunn.

I mai var målet nådd. Israels-vener over heile Norge bladde opp:

– Det var ein skammeleg resolusjon. Da avgjorde vi at nå er det viktig å samle inn éin million kroner. Det målet har vi nådd, sa styreleiar John Skåland i Karmel-Instituttet då han talte i busetjinga Ma´ale Efraim 10. mai.

Karmel Israel-Nytt melder at millionen skal finansiere tre nye hus i tre busetjingar i området organisasjonen namngjev som Samaria, ikkje Vestbreidda.

Skattegåvenekt

I 2012 kasta Finansdepartementet Karmel-Instituttet ut av gåvefrådragsordninga. Organisasjonen sendte pengar til ulovlege busetjingar, slo departementet fast.

Bakgrunnen for utkastinga var ein klage frå Fellesforbundet og Norsk Folkehjelp: Karmel-Instituttet burde ikkje få vere med gåvefrådragsordninga, ei ordning som sikrar skattefrie gåver til frivillige organisasjonar.

Fellesforbundet og Folke­hjelpa meinte organisasjonen måtte ut då han støtta ­israelske busetjingar på okkupert område med skattefrie gåver. Klagen førte fram. Med støtte frå Utanriksdepartementet konkluderte Finansdepartementet med at Karmel-Instituttet braut folkeretten.

Styreleiar Skåland tok avgjerda med stor ro:

- Utkastinga motiverte oss berre til å samle inn endå meir pengar. Vi treng ikkje skattefritak for å støtte busetjarar, sa han til Vårt Land.

Buset

Under gåveoverrekkinga i mai sa Skåland at mange nordmenn er glade for å hjelpe israelarar med å busetje landet, melder Karmel Israel-Nytt.

– De er fint at de buset dykk i Israels land som også er landet til jødane, sa Karmel-leiaren til busetjarane som fekk millionen frå Norge.