Dei knuser glastak

Donald Trump blir USAs 45. president, sjølv om Hillary Clinton fekk 1.752.899 fleire stemmer i valet 8. november. Men Trump vann flest valmenn, og blir difor innsett som statssjef 20. januar.

I talen, der ho erkjente nederlaget, sa Clinton seg lei for at USAs tjukkast glastak heller ikkje denne gongen blei knust.

– Men ein dag vil nokon gjere det, vonleg før heller enn seinare, sa Clinton.

Likevel singla det heftig frå mange glastak som blei knuste då amerikanske veljarar gjekk til urnene. For dei valde ikkje berre ny president. Ei lang rekkje politiske verv blei fylte. Av kvinner.

LES MEIR: Trump blei størst hjå alle kristne veljargrupper

Latino

Catherine Cortez Masto er den første kvinnelege lationen som tek sete i Senatet, det mektigaste kammeret i Kongressen. Juristen Masto som er innvalt frå Nevada er også den første kvinnelege senatoren frå delstaten.

Demokraten var statsadvokat i Nevada i to periodar, frå 2007 til 2015. Mastos bestefar var innvandrar frå Mexico.

Jamaica

Kamala Harris blir den første indiskamerikanske senatoren når ho tek plass i Senatet i januar. Ho er også den første afroamerikanske senatoren frå California.

Harris' multikulturelle bakgrunn er denne: Mora Shyamala Harris innvandra til USA frå India medan faren Donald Harris utvandra frå Jamaica. Hans forfedre kom til øya som slavar frå Afrika.

Juristen Harris er demokrat, og kjem frå jobben som statsadvokat i California. Her var ho den første kvinnelege, den første indisk-amerikanske og den første afroamerikanske statsadvokaten.

Irak

Tammy Duckworth knuste også eit glastak 8. november. Ho steig opp som senator, frå delstaten Illinois - ved hjelp av to krykker. Duckworth er veteran frå krigen i Iraq. Her mista ho begge beina i ein helikopterstyrt.

Etter både sivil og militær utdanning valde Duckworth å bli helikopterpilot, for det var ein av få opningar for kvinner til å kome i ein kampavdeling.

Demokraten blei den første asiatisk-amerikanske kvinna som blei valt inn i Kongressen i Illinois – og den første funksjonshemma kvinna i Representantanes hus, i 2013. Faren var amerikansk, mora er thai-kinesisk. 8. november blei Duckworth senator.

LES MEIR: Hareide dropper «kristen» etter Trump-seier

India

Medan Kamala Harris knuste glastak i Senatet, singlar det rundt Pramila Jayapal i Representanes hus. Borgarrettsaktivisten er den første indisk-amerikanske kvinna i Huset. Ho kom til USA 16 år gammal for å studere på college. Demokraten blei amerikansk statsborgar i 2000.

Bifil

I Oregon blei Kate Brown historisk. Demokraten er den første opne LHBT-personen som er valt til guvernør i USA. Brown er open om at ho er bifil. Guvernøren er gift med ein mann.

Somalia

Ilhan Omar kom til USA som flyktning frå Somalia i 1995. 11 år seinare er ho blitt den første somalisk-amerikanske lovgjevaren i USA. Omar er valt inn i delstatsforsamlinga i Minnesota. Borgarrettsaktivisten representerer Minnesota Democratic–Farmer–Labor Party, eit sosialliberalt parti med nære band til Det demokratiske partiet.

– Eg representerer stemmene til muslimane. Eg representerer unge mødrer som leitar etter sjansane, sa Omar då valsigeren var eit faktum.

34-åringen dunka ut ein veteran, Phyllis Kahn, som måtte gje seg etter vel 23 år i vervet.