– Dette kunne ikkje skjedd på Austlandet. Det er eit stjerneeksempel på dugnad og får pallplassering blant eksempla eg har høyrt, seier Jan Olav Ryfetten som er dagleg leiar for Stiftelsen Soria Moria og Stiftelsen bidra.no, som begge har som formål å styrke det frivillige arbeidet i Norge.
Han klappar i hendene over blant anna følgjande innsats for å reise nye Ålgård kyrkje:
• Dugnad verdt 5 millionar kroner.
• 12 millionar i pengegåver.
• Lokal bedrift lånte ut arbeidar gratis i over to år.
LES MER: – Djervere tanker om kirkebygg
Ung forsamling
I dag skal den splitter nye kyrkja med ei grunnflate på 1.500 kvadrat meter bli innvia. Assisterande byggjeleiar Øystein Fuglestad er veldig stolt over dugnadsinnsatsen.
– Dugnaden har vore med på å skape eit nytt og ungt fellesskap av folk i kyrkja. Det i kombinasjon med ei hypermoderne kyrkje som no står klar gjer oss veldig stolte, seier han.
Byggjeleiaren meiner Jæren er dugnadsplassen framfor alle.
– For 30 år sidan bygde vi idrettshall her på Ålgård, og så oppgraderte vi den for ti år sidan. No var det kyrkje som stod for tur, seier Fuglestad.
LES MER: Biskop: – Kirkebygg må nedprioriteres
50 personar til dovask
Frivillige har blant anna gjort følgjande:
• Laga uteområdet. For eksempel støyping av trapp, legging av granittheller og påfyll av jord på plen og blomsterbedd.
• Utvask av bygget til ein verdi av 400.000 kroner.
• Avfallslevering frå alt i byggjeprosessen.
• Reinhald i brakkene som dei tilsette arbeidarane har nytta, med toalett, kantine med meir. 50 personar har rullert på å vaske alt to gongar i veka i over to år.
• Førprosjektet med skisser og førebuing av vedtak er leia av ein prosjektleiar frå kyrkjelyden som gjorde mykje av arbeidet gratis. Arbeidsoppgåvene til hovudentreprenøren er utført av ein frivillig.
[ SE BILDER AT NYE ETNE KIRKE ]
Spår meir dugnad
Sjølv arbeider Øystein Fuglestad i eit IT-firma. På grunn av lang og tru teneste i firmaet, og at sjefen ser verdien i kyrkjeprosjektet, har Fuglestad fått bruke mykje av arbeidstida si til dugnadsinnsats.
– Det er sjeldan eg høyrer om eit så tydeleg bidrag frå eit firma, men eg er ikkje i tvil om at bedrifta vil få noko tilbake for det. Generelt meiner eg at frivillig arbeid er limet i samfunnet vårt. Etter 20 til 30 år der vi har blitt late på grunn av omsorgsstaten, er vi no på veg tilbake til at staten ikkje kan gjere alt for oss, seier Jan Olav Ryfetten i Stiftelsen Soria Moria.
Følg oss på Facebook og Twitter!
Han spår difor fleire kraftige dugnadsinnsatsar i tida som kjem. Dersom eit lokalsamfunn treng ny idrettshall, kan ein ikkje lenger berre banke på døra til kommunen, men må også gå frå dør til dør for å få folk til å stille opp.
– I enkelte kyrkelydar har det vore slik heile tida. Det vi ser i Ålgård er den protestantiske pliktetikken som slår inn, og då stiller folk opp. Det er gudstrua som slår ut i praksis, seier han.
– Er dugnadsaktiviteten ekstra høg på Jæren?
– Eg kjenner ikkje til regionale forskjellar. Men det har alltid vore sterk dugnadskultur i kyrkje og speidarrørsla, og her slår begge deler inn, seier han.
Ålgård har nemleg ei stor og tradisjonsrik speidargruppe som har eksistert sidan etterkrigsåra. Den har framleis rundt 130 aktive speidarar. Fleire av dei som har vore aktive i dugnaden er tidlegare Ålgård-speidarar.
LES MER: Nordlyskatedralen trakk fleire enn gamlekyrkja på julaftan
Stappfullt
Kapasiteten i den gamle kyrkja har til tider vore sprengt.
– Det bur 9.000 menneske på Ålgård og relativt ofte har vi hatt for lite plass. Dersom det er unge som døyr, blir kyrkja overfull. Når vi har konfirmasjonar må vi arrangere ti gudstenester fordelt på to helger, seier Fuglestad.
Den nye kyrkja har plass til nærmare 550 personar.