Vågar ikkje sende inn politiet

– Brevet gjer greie for den gode og verdige asylprosessen frå ­registrering til endeleg vedtak og er sendt til Den norske kyrkja, som så skal distribuere det ut til kyrkjelydane. Slik skal alle kyrkjelydar bli godt opplyste, fortel statssekretær Vidar Brein-Karlsen (Frp) i Justisdepartementet til Vårt Land.

Ordet kyrkjeasyl er ikkje nemnt ein gong i brevet, men Brein-Karlsen er klar på at ­departementet vonar at brevet skal ha ein bestemt effekt: Ingen fleire i kyrkjeasyl i lokalkyrkjer i Den norske kyrkja.

Søkte vern

Før brevet – som har overskrifta «Informasjon til Den norske kirke om asylsprosessen i Norge» – hadde Solberg-regjeringa to møter med kyrkjeleiinga. På det første i februar stilte dei blåblå med justisministeren, innvandringsministeren og kulturministeren.

Møtet fann stad få veker etter at asylsøkjarar, som kom frå Russland til Norge over Storskog i fjor haust, gjekk i kyrkjeasyl i Finnmark for å hindre å bli ­deporterte til Russland.

1. desember i fjor meldte avisa Dagen at for første gang på 22 år sat det ikkje ein einaste ­kyrkjeasylant i Den norske kyrkja. I løpet av nokre hektiske veker i desember og januar søkte mange asylsøkjarar til kyrkja for å få vern mot utkasting.

LES MEIR Kyrkja vil ikkje lage retningsliner for kyrkjeasyl

Oppheve forbod

Frp-styrte Justisdepartementet (JD) vil gjerne setje ein stoppar for at asylsøkjarar med endeleg avslag prøver å overprøve utlendingsforvaltninga. Framstegspartiet vil saman med regjeringskollega Høgre ha slutt på ordninga med kyrkjeasyl. «Det vil være regjeringens syn at kirkerommet ikke skal brukes til kirkeasyl», slår dei blåblå fast i regjeringserklæringa.

Men sidan 1993 har politiet hatt forbod mot å gå inn i kyrkjer for å hente ut asylantar med endeleg avslag, som ikkje vil reise ut av Norge. I 1993 sende justisminister Grete Faremo (Ap) ut eit rundskriv til landets politisjefar som sa at politiet skal stoppe på kyrkjetrappa. I 23 år har inga regjering freista å oppheve påbodet.

Ikkje fleirtal

Statssekretær Vidar Brein-Karlsen (Frp) i JD fortel til Vårt Land at politisk leiing i departementet ikkje er budd på å sende ut eit nytt rundskriv som opphevar påbodet. JD har to Frp-statsrådar. Sylvi Listhaug har ansvaret for innvandringspolitikken medan Anders Anundsen styrer politiet.

– Vårt inntrykk er at det ikkje er politisk fleirtal for å oppheve rundskrivet frå '93, seier Brein-Karlsen.

I Danmark gjorde justisministeren i den konservative regjeringa til Lars Løkke Rasmussen, som kom tilbake som statsminister i fjor, kort prosess med kyrkjeasylet i 2009. Då blei politiet sendt inn i Brorsons kyrkje i København for å hente ut 17 irakarar. Mennene vona på vern mot utsending.

Ein liknande aksjon er ikkje Justisdepartementet og regjeringa budd på. Statssekretær Brein-Karlsen stadfestar at det er av omdømmeomsyn.

LES MEIR Kyrkjeasyl splittar befolkninga

Smuldra opp

Justisminister Anundsen har prøvd seg med brev tidlegare. I 2013 instruerte han politidirektør Odd Reidar Humlegård, i brevs form: Ordninga med kyrkjeasyl skal vere avslutta innan utgongen av 2014 - i samarbeid med «Kirken».

Møter mellom Politidirektotatet og Mellomkyrkjeleg i råd i 2014 munna ut i ingenting.

– Vi har hatt fleire møter med statsrådar, og forstår at det er viktig for regjeringa å få fortalt alle som søkjer asyl om sjølve prosessen, så vi skal gjere ­informasjonsskrivet kjent. Når det kjem til kyrkjeasyl, kan ikkje kyrkja avslutte noko som kyrkja ikkje har etablert. Samstundes stengjer ikkje kyrkja dørene for nokon, seier direktør Jens-Petter Johnsen i Kyrkjerådet.

På heimesida skriv Den norske kyrkja at «Hvis et kirkeasyl oppstår, må den enkelte menighet selv vurdere hvordan den best skal handle og forholde seg til situasjonen».