På høgre skulder på draktene skal reklamebodskapen stå, «Visit Rwanda» - og på reklameskilt på Arsenals heimebane. Den engelske toppklubben får godt betalt, 350 millonar kroner.
Sidan sponsoravtala vart offentleggjort i mai, har britiske og nederlandske politikarar klaga over det er uansvarleg bruk av bistandspengar å støtte ein fotballklubb i England. Verdsbanken opplyser at bistand frå utlandet har utgjort mellom 30 og 40 prosent av statsbudsjetta til Rwanda.
«Ikkje bistand»
Utgiftene til denne kampanjen kjem frå andre kjelder enn bistand frå utlandet, ifølgje Claire Akamanzi, som er direktør i Rwandas utviklingsråd.
– Rwandas utviklingsråd får inntekter gjennom sal av turismeprodukt, og bruker ein del av dette til å marknadsføre våre produkt for vidare vekst, seier Akamanzi i ei uttale på Twitter.
Ho meiner folk må vere klar over kva positive effektar avtala kan få.
– Dei som kritiserer vår avtale med Arsenal på grunn av at Rwanda er fattig og mottar bistand, ynskjer anten at Rwanda for alltid skal vere slik, eller forstår ikkje at marknadsføring er ein av dei viktigaste utgiftene til eit selskap, seier Akamanzi.
Ho meiner at jo meir Rwanda tener på turisme, dess meir kan landet investere i folkets behov.
Ifølgje det statlege utviklingsrådet er inntektene knytt til turisme i Rwanda i dag 3,4 milliardar kroner i året, og målet er at dette talet skal vere det dobbelte i 2024.
Tvilsamt
Norge gir ikkje bistand til staten i Rwanda, men gir bistand gjennom norske organisasjonar som arbeider i landet. Derfor tyder ikkje noko på at norske bistandspengar har vore involvert i sponsoravtala.
– Det ville i så fall ha vore ein tvilsam og høgst kritikkverdig bruk av norske bistandspengar. Det er vanskelig for meg å sjå samanhengen mellom kampen mot fattigdom, og draktreklame hjå ein fotballklubb som Arsenal, seier Hårek Elvenes (H), i utanrikskomiteen på Stortinget.
Han seier det ikkje er prioritert for norsk bistand å arbeide for meir turisme i mottakarlandet.
– Bistand skal ha som mål å betre utdannings- og helsetilbodet, infrastruktur og næringsutvikling i landet, seier Elvenes.
Må vere smarte
Rune Bjerke er førsteamanuensis på Høyskolen Kristiania og forskar på marknadsføring. Han trur ein slik kampanje er ein god ide, men at det er vanskeleg å vite om det vil gi pengar tilbake til Rwanda.
– Det kjem an på korleis dei utnyttar potensialet med å knyte til seg populære fotballspelarar. Berre ein logo på skuldra på drakta vil ikkje vere nok, men dersom dei lager gode PR-kampanjar i tillegg, då kan det vere ein god ide, seier han.
Fotballklubben Arsenal har opplyst at laget skal reise til Rwanda og ha treningsleir i sommar, før fotballsesongen byrjar, og Bjerke trur dette kan vere verdifull marknadsføring.
– Når dei reiser dit på treningsleir, reknar eg med at dei får med seg journalistar som lager oppslag i media om at dei er der og ser landet. I tillegg reknar eg med at dei får fotballstjernene til å promotere landet i sine sosiale mediekanalar, som har eit stort publikum. Det trur eg vil vere verdifullt, seier marknadsføringsforskaren.
Han understrekar at tida vil vise om dette er ei god investering for Rwanda, eller ikkje, fordi reiselivskampanjar kan vere komplisert å få god effekt av. Men Bjerke meiner at denne typen marknadsføring er klokare enn å arrangere store, dyre arrangement, som OL i Sør-Korea eller sykkel-VM i Bergen.