Nyheter

– Prøver å vere martyr for ytringsfridom

Ekstremismeforskar Lars Gule meiner støttemarkeringar for islamkritiske Tommy Robinson viser fram dobbeltmoralen i ytterleggåande miljø.

Ytringsfridom har blitt løfta fram i eit oppheta ordskifte i Storbritannia den siste veka. Aktivisten Tommy Robinson vart dømt til 13 månader fengsel. Han vart arrestert for å ha filma dei sikta i ein stor og alvorleg overgrepssak.

Robinson sa han ønskte å vise fram dei sikta i overgrepssaka, som i hovudsak er muslimske menn med bakgrunn frå Sør-Asia.

– Han prøver å framstille seg sjølv som ein apostel for ytringsfridomen, som ein slags martyr. Men det verkar meir som ein kamuflasje for å angripe og stigmatisere muslimar og islam, lyder Lars Gules analyse. Gule forskar på ekstremisme ved OsloMet.

Grunnleggjar

Robinson, som eigentleg heiter Stephen Yaxley-Lennon er ein av grunnleggarane av English Defence League og Pegida UK, som er to grupper som kjempar mot islam i Storbritannia.

Robinson vart dømd for forakt for retten, etter at han braut referatforbodet i samband med rettssaka, då han direktesendte video av dei tiltalte. Dommen har utløyst store protestar frå grupper på ytre høgre i heile Europa, som meiner domstolen krenka Robinsons ytringsfridom, og dermed også ytringsfridomen til hans meiningsfellar.

Tidlegare justisminister Per-Willy Amundsen (Frp) er mellom dei som har engasjert seg. Stortingsrepresentanten er kritisk til dommen mot Robinson, og skreiv mellom anna følgande i eit facebook-innlegg med eit bilete av Robinson med teip over munnen.

«Hva skjer i Storbritannia? (…) Når ble ytringsfriheten en ikke-sak?»

«Knebling»

Max Hermansen i Pegida Norge leia ein demonstrasjon utanfor Storbritannias ambassade i Oslo fredag, og meiner dommen mot Robinson krenkar ytringsfridomen til grupper på ytre høgre.

– Han prøver å påpeike eit stort problem i samfunnet, nemleg at muslimske menn misbrukar unge jenter. Men styresmaktene prøver å kneble eit kvart forsøk på å sette fokus på dette, seier Hermansen.

Vernar

Han er ueinig i at Robinson braut referatforbodet i samband med rettssaka, og vil fjerne lover som hindrar filming av tiltalte i ei rettssak.

- Dersom dei tiltalte ikkje vil bli sett, kan dei skjule andleta sine utanfor rettssalen.

Hermansen meiner slike lover vernar overgrepsgjengar, ikkje dei unge jentene som er dei reelle offera i denne saka.

Inkonsekvent

Ekstremismeforskar Gule meiner at protestane frå ytre høgre-miljø i denne saka, er typisk for ytterleggåande grupper si forståing av ytringsfridom.

– Grupper på ytre høgre, men òg på ytre venstre, er gjerne inkonsekvente om ytringsfridom. Dei blir gjerne fortørna når dei opplever at deira eigen fridom blir krenka. Samtidig vil dei innskrenke rettar til å kle seg i hijab, seier Gule, og siktar til at det å kle seg i hijab er ei ytring på same måte som verbale ytringar.

Selektivt

Han meiner at motstanden mot lovene som regulerer identifisering under rettssaker er dobbeltmoralsk, når målet er å påpeike at muslimar har manglande respekt for vestlege lover.

– Det er uttrykk for ein selektiv omgang med kva lover som skal gjelde, og ikkje. Desse aktivistane meiner at lovverket er viktig, berre når muslimar bryt lova, seier han.

Samanhang

Gule meiner Robinsons handlingar kan sjåast i samanheng med tidlegare saker i Storbritannia der grupper på ytre høgre har meint seg knebla.

- Det verkar som at Robinson prøver å sette denne saka inn i konteksten av tidlegare saker, slik at dette inngår i ein større diskusjon om ytringsfridom, meiner Gule.

Les mer om mer disse temaene:

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter