Nyheter

NMS tar opp att støtta til den gassiske kyrkja

Etter fleire månader med stans i pengestøtte er forholdet mellom NMS og den gassisk-lutherske kyrkja (FLM) no igjen normalt.

Dette melder Det norske misjonsselskap (NMS) i ei pressemelding. NMS normaliserer no forholdet til kyrkja på Madagaskar etter ei rekke oppklaringsrundar.

– Vi er svært glade for den responsen vi har fått frå kyrkjeleiinga i FLM. For NMS er det viktig at vi igjen kan gi støtte til dei prosjekta vi støttar på Madagaskar, seier Anne Karin Kristensen, som er leiar for NMS Global, i pressemeldinga.

Ho seier at dei svara som FLM har komme med, vitnar om vilje til openheit i samarbeidsrelasjonen med NMS.

Val av kyrkjeleiing

Forholdet mellom NMS og FLM har skurra ei stund og NMS har stilt krav til kyrkjeleiinga om betre forvaltning. Konkret gjeld det openheit og etterrettelegskap i samband med vala av synodeleiarar og hovudleiinga i kyrkja som føregår i år og dessutan revisjon av to rekneskapsrapportar.

– NMS har no mottatt dei rekneskapsrapportane vi har bedt om. Det er framleis nokre spørsmål som må jobbast vidare med, men vi er tilfredse med dei svara vi har fått om den viljen til samarbeid som kyrkjeleiinga no signaliserer, seier Kristensen.

Ramma av korona

NMS valde å stansa dei økonomiske overføringane til FLM i mai i år og dette fall saman med massive korona-restriksjonar.

Madagaskar har vore gjennom ein dramatisk stenging av all offentleg verksemd og dette har ifølgje NMS ramma FLM hardt. I tillegg er fleire i den sentrale kyrkjeleiinga vorte ramma av sjukdommen.

Kyrkjepresident David Rakotonirina vart ramma av Covid 19 og døydde. Dette har vore eit sjokk for familien, heile FLM og òg for NMS. Det har sett FLM i ein vanskeleg situasjon prega av sorg. Benil Octave som var visepresident, er no fungerande kyrkjepresident.

I dialog med Norad

Koronarestriksjonane har ført til at all reiseverksemd er opphøyra og fleire prosjekt rundt om i verda har stansa opp. Så lenge prosjekta ikkje er i funksjon, vil det heller ikkje bli betalt ut pengar til dei. På Madagaskar har NMS tatt opp att utbetalinga av lønn til dei som er tilsette i prosjekta som organisasjonen er engasjerte i.

– Norad har støtta fleire prosjekt som FLM driv. Med den same grunngivinga som NMS har hatt, har dei stansa all utbetaling til desse prosjekta. Førebels har ikkje Norad gitt noko svar om dei kan komma til same konklusjon som oss, men vi er i dialog med dei om kva dei tenker om støtte til dei prosjekta som er støtta av dei, seier generalsekretær Helge S. Gaard i NMS.

Viktig samarbeidspartnar

Gaard understrekar at FLM er ein viktig samarbeidspartnar for NMS. Derfor er han glad for at forholdet til den gassiske kyrkja no er i ferd med å normaliserast.

– Rundt om i heile Noreg sit det givarar som har eit sterkt engasjement for folket og arbeidet på Madagaskar. Bodskapen til alle desse er at dei må halda fram innsamlingsarbeidet. Pengar som blir samla inn i Noreg til Madagaskar vil igjen bli overført til prosjekta vi støttar, seier ein letta generalsekretær i NMS, som understrekar at forholdet mellom NMS og alle samarbeidspartnarane rundt om i verda er prega av koronapandemien.

– Vi ser fram til at vi igjen kan møtast fysisk. Men det er umogleg å føresjå når dette kan skje. Inntil smittesituasjonen er under kontroll, må vi halda oss til dei restriksjonane som finst, seier Gaard.

LES MER:

Alf Gjøsund: «Fortapelsen er ikke noe Gud påfører oss, det er noe vi selv påfører oss og andre»

Reportasje: Ein muslim søker nattverd

«Filip» og «Sofia» valgte abort i uke 20. Så valgte de å begrave sønnen sin

---

Fakta:

---

Les mer om mer disse temaene:

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter