Moskeen blei for liten, fekk be fredagsbøn i kyrkje

Kyrkjer og moskear har opna i Tyskland, men i alle gudshus må det vere 1,5 meter mellom kvar frammøtt. Derfor blei Dar Assalam-moskeen i Berlin for liten då det stunda til siste fredagsbøn under ramadan, melder BBC. Berre ei mindre gruppe ville fått høve til å delta.

Betre plass

Ei kyrkje i nabolaget fekk høyre om tilhøva - og dermed opna Marthakyrkja i bydelen Kreuzberg opp for fredagsbøn. Dermed fekk langt fleire høve til delta. Den muslimske fastemånaden ramadan blir avslutta med festen id på sundag.

Glede i krisa

Om fredagsbøn i ei kyrkje, seier Mohamed Taha Sabry, imam i Dar Assalam til nyhendebyrået Reuters:

– Det er eit flott teikn, og det gjev glede under ramadan og glede midt i denne krisa.

Han leia forsamlinga i bøn, overvaka av jomfru Maria; motivet i eit glasmåleri i Marthakyrkja.

«Er Guds hus»

Samer Hamdoun, som var mellom dei som søkte fredagsbøna i kyrkja, fortel at det var ei underleg oppleving, særleg på grunn av musikkinstrumenta og bileta i kyrkja:

– Men det er mindre detaljar, dette er Guds hus.

Pastor var med

Prest i Marthakyrkja, Monika Matthias, deltok under fredagsbøna.

– Eg heldt ein tale på tysk, fortel ho Reuters.

– Og under bøna sa eg berre ja, ja, ja fordi me har dei same sutene og kan lære av kvarandre. Det var vakkert å kjenne det slik.

Dårleg økonomi

Islamsk råd, ein paraplyorganisasjon for 400 tyske moskear, sa i april at mange frykta konkurs fordi stenginga strekte seg inn i ramadan, ein periode som er særs viktig økonomisk, for då gjev mange pengar til den lokale moskeen, melder Reuters.

LES MEIR

[ Nå feires en annerledes ramadan – moskeer er stengt og det advares mot faste ]

ELLER LES HELGAS HOVUDSAK

[ Adventistenes brysomme bok - I 130 år har dystre endetidsprofetier og krass kirkekritikk vært en viktig del av adventistkirkens budskap ]

---

Fakta:

---