Nyheter

Måtte betale Børge Brende tilbake 355 kroner

Norge deler ut raust med bistandsmilliardar. Svindeljegerane finn store og små kjeltringar. I Malawi måtte Leger uten grenser betale tilbake 355 kroner. Tjuvar fekk sparken.

Bilde 1 av 2

Freistingane blir for store. Nokre tek litt. Andre mykje. Få er grådige.

I åra Norge er blitt styrt av ei blåblå regjering, har bistandsbudsjettet auka. I fjor rådde utanriksminister Børge Brende (H) nesten 35 milliardar kroner i kampen mot fattigdom og på å løyse humanitære kriser.

Sentral kontrolleining i Utanriksdepartementet (UD) og Varslingslaget i Norad fekk inn 890 varsel om underslag, tjuveri, misbruk og feilbruk i fjor. 745 saker var avslutta då nyttårsrakettane steig til vers. Totalt kravde Utanriksdepartementet og Norad tilbake 7,1 millionar kroner.

– Vi sender ut eit tydeleg signal, Norge har nulltoleranse, slår kontrolldirektør Nils Haugstveit i Utanriksdepartementet fast.

LES MEIR Åpner for korrupsjon

Hendene i kassa

Nesten halve verda får norsk bistand, der store summar blir kanaliserte gjennom norske hjelpeorganisasjonar, som har eit stort nett av partnarar i fattige land i Sør. Norge støttar 1.000 frivillige hjelpeorganisasjonar i utviklingsland, opplyser Norad – som ønskjer å kutte hardt i talet på slike organisasjonar som får norske uviklingskroner.

Fleire av desse organisasjonane har medarbeidarar som ser sitt snitt til å stikke hendene i kassa. Lista over økonomisk misleghald i norsk bistand 2016 fortel at folk gjer seg til kjeltringar for små summar, med dramatiske konsekvensar:

Mista jobben

• Malawi, Leger uten grenser: «Mindre misligheter i tre prosjekter i Malawi, herunder tyveri av medisiner og falske kvitteringer. Noradmidler bare delvis berørt. Lokalt ansatte sagt opp. NOK 355 er tilbakebetalt».

• Laos, Redd Barna: «Gransking av lokal partner av Redd Barna i Laos konkluderte med fiktive transportkostnader i forbindelse med seminardeltakere. NOK 519 er tilbakebetalt».

• Guatemala, Røde Kors Guatemala: «Internrevisjon avdekket forfalsket kvittering. To ansatte sa selv opp. NOK 736 er tilbakebetalt».

– Vi praktiserer nulltoleranse. Tjuveri og underslag er heilt uakseptabelt, seier programsjef Kyrre Lind i Leger uten grenser.

Den medisinske hjelpeorganisasjonen har ingen nasjonal organisasjon i landa dei i opererer i, men er avhengige av å tilsetje lokale medarbeidarar. Programsjef Lind forstår at det kan opplevast hardt å sparke medarbeidarar som gjer seg til kjeltringar for 355 kroner, men seier at slik må det vere.

Betalte gjeld

I den andre enden av svindelskalaen, ligg to millionunderslag:

• USA, Search for Common Ground (hjelpeorganisasjon): «Midler brukt i strid med avtale, herunder bruk av prosjektstøtte til driftsutgifter og gjeldsbetaling. NOK 1.030.678 er tilbakebetalt».

• Nicaragua, LO: «Utbetaling til privat konto, mangelfull rapportering og manglende vilje til å besvare spørsmål fra revisor hos lokal partner. LO har avsluttet samarbeidet. NOK 1.290.619 er tilbakebetalt».

Må betale

Storleiken på den aktuelle summen er ikkje avgjerande for kontrolldirektør Haugstveit og hans fem svindeljegerar i UD.

– Spelereglane er kjende for dei norske organisasjonane som forvaltar bistandsmidlar. Når misleghald blir avdekt, skal summen betalast tilbake.

– Og dette lever organisasjonane godt med, sjølv når det handlar om små summar?

– Ja, vi har eit godt forhold til dei norske bistandsorganisasjonane.

– Er det kontrolleining i UD og Varslingslaget i Norad som avdekkjer alle saker?

– Nei, dei fleste sakene blir avdekte av organisasjonane sjølve.

Kontrolldirektør Haugstveit rosar haldningane som rår ute i dei frivillige organisasjonane. Det er viktig å slå hardt, og likt ned på underslag, tjuveri, misbruk og feilbruk.

Får sparken

– I fleire saker frå i fjor mistar lokalt tilsette jobben etter underslag, tjuveri og svindel, blir sakene melde til lokalt politi?

– Den personalmessige handteringa er organisasjonane sitt ansvar. Dersom det er snakk om straffbare handlingar rår UD organisasjonane til å vurdere å melde sakene til politiet. Om det er tilrådeleg er mellom anna avhengig av rettstryggleiken på staden, seier Haugstveit.

LES OGSÅ: Meiner nulltoleranse for korrupsjon roar ned dei bistandskritiske

Meldt til politiet

To dømer frå fjoråret viser at politi blei kopla inn:

• Tanzania, Fokus: «Underslag hos lokal partner. Den ansvarlige er politianmeldt. NOK 98.500 er tilbakebetalt».

• Rwanda, Norsk Folkehjelp: «Tyveri av regnskapsdokumentasjon og manglende redegjørelse for bruk av midler hos lokal partner. En ansatt ble sagt opp og forholdet politianmeldt. NOK 92.574 er tilbakebetalt.»

LES OGSÅ: Kampen mot maktmisbruk har stått på siden femte Mosebok

Les mer om mer disse temaene:

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter