– I dag er folk tilbake på jobb, seier Usman Asif på telefon frå Tyrkia.
Vårt Land snakkar med han laurdag morgon. Han er på ferie i Konya, som ligg midt mellom hovudstaden Ankara og feriestadane i sør.
LES ANALYSEN: Landet med mektige generaler
Foreløpige tal laurdag morgon viser at 194 menneske vart drepne og 1.154 såra i samband med kuppforsøket mot president Recep Tayyip Erdogan fredag kveld. Regjeringa har no tatt kontroll over situasjonen, og til saman er over tusen offiserar i Tyrkias væpna styrker arrestert.
Mista tilgang til sosiale media
Sjølv om situasjonen har roa seg laurdag føremiddag, kjende Asif på spenninga fredag kveld.
– Folk var spente på kven som sto bak, og i kven sin favør det ville gå. Det var ein del som køyrde rundt i sentrum av byen her og prøvde å samle folk for å vise støtte til regjeringa. Dei tuta og veiva med flagg, fortel Asif.
LES OGSÅ: 265 drept – 1.154 såret i Tyrkia
Sjølv følgde han med på sosiale media.
– Eg følgde med på Twitter og byrja rapportere herfrå via min eigen konto. Først prøvde eg å få kontroll. Mykje blir overdrive på nettet, fortel han.
Somme spekulerte i om Erdogan sto bak sjølv. Asif meiner det er lite sannsynleg, men legg til at tyrkarar likar konspirasjonsteoriar. Sjølv prøvde han å finne ut kva som verka mest logisk av det som vart rapportert.
Men så mista han og venene tilgang til sosiale media.
– Då såg eg alvoret i situasjonen. Det var kaotisk. Vi såg umiddelbart behovet for oppriktige nyhende, men berre statleg kontrollerte kanalar var tilgjengelege.
Sivile skotne
Asif har vener i Istanbul, som han heldt kontakt med fredag kveld. Etter kvart fekk han vite at opprøret var konsentrert på to plassar – brua der soldatane samla seg, og ved parlamentet i Ankara.
– Kjennest det trygt å vere i Tyrkia no?
– Det kjennest ikkje trygt i går kveld. Folk fekk med seg at sivile vart skotne i dei store byane. Det var veldig farleg for dei som var i dei to områda med mest uro, seier Asif.
Lynsjing
Asif trur president Erdogan vil vise styrke ved å straffe kuppmakarane hardt.
– Landsforrædarar har blitt straffa hardt i Tyrkia tidlegare. Han som no er visestatsminister vil innføre dødsstraff, og mange i regjeringa vil sikkert vise at dei har kontroll. Det kan føre til lynsjing og straffing av soldatar som elles ikkje ville skjedd her, trur han.
Foreløpig vil ikkje kuppforsøket endre på ferieplanane til Asif.
– Det som er viktig for oss, er å vite kva rute vi kan ta tilbake. Men ting kjem på stell her veldig fort, og alt kjennest normalt no.
