Den bosniske fotografen Tarik Samarah har reist jamleg til Srebrenica i dei 20 åra som har gått sidan serbiske styrkar samla saman bosniske menn og gutar nokre julidagar i 1995. Alle 8.000 blei slakta ned fordi dei var det dei var; bosniarar – og muslimar.
For å minnast folkemordet på tampen av krigen i Bosnia-Hercegovina har HL-Senteret i Oslo kjøpt inn ei utstilling av Samarah-fotografi.
– Srebrenica er framleis eit ope sår. Kvar 11. juli blir det framleis gravlagt nye identifiserte offer, fortel Guri Hjeltnes, direktør på HL-Senteret.
Kjem frå delt land
I går blei fotoutstillinga opna av Bosnia-Hercegovinas nyvalde statsminister som gjestar Norge.
– Korleis kunne det skje? Srebrenica må minne oss alle om at barbariet aldri må finne stad på nytt, oppmodar Denis Zvizdic.
I april blei han statsminister for ei regjering på ti medlemmer; tre serbiske, tre kroatiske og tre bosniske statsrådar pluss Zvizdic. Krangelen om maktdeling og kven som skulle sitje i regjeringa tok seks månader og viser det sterkt delte Bosnia-Hercegovina – ei deling bosniaren Denis Zvizdic ikkje snakkar høgt om.
– Srebrenica er ei sorg for alle i Bosnia, seier han.
Følg oss på Facebook og Twitter!
Heidra offer
Blant serbarane i Bosnia-Hercegovina, som har sin eigen delstat, Republika Srpska, er mange sterkt usamde med Zvizdic i synet på Srebrenica. Ordet folkemord blir ikkje brukt.
Men i april fann det stad ei hending som varsla at presidenten i ententen – eller delstaten – Republika Srpska har fått eit litt endra syn på saka:
– Det er sant at det fann stad ei kriminell handling her, og eg beklagar alle ofra, sa Milorad Dodik då han overraskande gjesta gravlunden i Potocari der Srebrenica-ofra blir gravlagt, og la ned blomar på minnesmerket.
Dodik, som kjempar for å lausrive Republika Srpska frå Bosnia-Hercegovina, sa i mai at historia om Srebrenica ikkje er komplett utan at dei serbiske ofra er innlemma. Dodik vil ha ein internasjonal granskingskommisjon av det FN har slått fast er eit folkemord.
