Ståle Ulriksen, forskar og forsvarsanalytikar ved Norsk utenrikspolitisk institutt (NUPI) og Sjøkrigsskolen, har ikkje tru på aksjonen som no bli mobilisert i vestlege hovudstadar etter terrorangrepa i Paris:
Fleire fly over Syria, med mål om å bombe den såkalla Islamske staten (IS) vekk frå bakken.
– Frankrike kan ikkje opptre åleine på denne arenaen, sa landets forsvarsminister, Jean-Yves Le Drian på eit møte med EUs forsvarsministrar i går.
Danmark svarte at landet vurderer å delta i luftkrigen i Syria. Norge er avventande. Regjeringa har ikkje fått ein formell førespurnad, opplyser statsministeren.
LES OGSÅ: – Må se mye lenger fram for å knekke IS
Bombar IS
Akkurat som Frankrike har Russland og USA intensivert bombinga av IS-mål i Irak og Syria dei siste døgna. Både franske og russiske fly har retta åtak mot IS-hovudsete Raqqa, som ligg i Syria. Frankrike melder at dei har øydelagt ein treningsleir. USA på si side har bomba IS-kontrollerte oljeanlegg i Syria og IS-mål i seks irakiske byer.
Ro og orden
Ståle Ulriksen trur ikkje bombestrategien fører fram:
– Ein vil ikkje klare å bombe vekk IS. Skal IS takast ut, må ein setje inn bakkestyrkar i form av spesialsoldatar eller fallskjermavdelingar som erobrar by etter by – og drep IS-krigarane eller tek dei til fange.
Men militæranalytikaren ser ingen teikn på at vestlege land er budde til å setje inn slike bakkestyrkar i Syria.
– Og set ein inn bakkestyrkar må ein gjere ein ting til; nokon må rykkje inn etter at IS er rydda av vegen og sikre ro og orden – ein må fylle maktvakumet som oppstår.
LES OGSÅ: IS bygger sitt imperium med sosiale medier
Manglar fred
Ulriksen seier at sjølv om IS blir knust, vil regionen vere ustabil:
• Både USA og Russland vil fjerne IS, men dei er ikkje samde om vegen vidare for Syria – Russland støttar president Assad, det gjer ikkje USA.
• Iran har soldatar i Syria som støttar Assad-regimet, og landet støttar Hizbollah-militsen i Libanon som har sendt tusental krigarar til Syria for å kjempe mot IS.
• Tyrkia avviser alle kurdiske framstøyt mot sjølvstende.
LES KOMMENTAREN: Hva er det som er så forlokkende med å ofre seg selv?
Vurderer opptrapping
I ein kommentar til opptrappinga av bombekrigen mot IS i Syria, seier utariksminister Børge Brende (H) til NTB at det er avgjerande å finna ei politisk løysing på borgarkrigen i Syria. Men han legg til at Norge også deltek i den militære innsatsen mot IS. Norge har sendt militære instruktørar til Nord-Irak som lærer opp kurdiske militæravdelingar – og spesialsoldatar til Bagdad. Desse driv opplæring av irakiske regjeringsstyrkar.
- Vi vurderer no korleis bidraget vårt skal vidareførast det neste året. Skulle det koma spørsmål om ytterlegare bidrag, vil dette sjølvsagt bli vurdert nøye, seier Brende.
[ LES ALLE SAKENE OM TERROREN I PARIS HER ]
Væpna av hæren
– Kva kan dette betyr, Ulriksen?
– Vanskeleg å vite kva regjeringa planlegg. Men det vil vere ærlegare av regjeringa å bruke forsvarets spesialstyrkar til slike bakkeoperasjonar som eg har skissert.
– Kvifor det?
– No driv dei med opplæring av avdelingar i Irak som ein ikkje heilt veit kva kan finne på.
Fleire av militsgruppene som deltek i offensiven mot IS i Irak – og som Norge støttar med 120 soldatar – står på USAs liste over terroristorganisasjonar. Human Rights Watch og Amnesty melder at sjiamuslimske militsgrupper står bak massakrar, hemndrap, tortur og plyndring i områda dei har erobra frå IS. Sjiamilitsen får våpen av regjeringshæren.
Kom etter
Før NATO-toppmøtet i Wales i fjor haust var Solberg-regjeringa nølande til å ta del i krigen mot IS. Men etter at USA inviterte ei lang rekkje land inn i ein koalisjon av villige, sa også Norge seg villig. Bidraget blei 120 militære instruktørar.