Misjonssambandet møtest etter år med uro
GENERALFORSAMLING: Det er mykje spenning knytt til storsamlinga til Misjonssambandet denne veka. Sidan siste generalforsamling har organisasjonen opplevd varslingssaker, konflikter og at ein generalsekretær måtte gå.
STOR SAMLING: Åpningsmøtet til generalforsamlinga til Misjonssambandet tirsdag kveld. Dei møtast på Oslofjord Convention Center i Stokke kommune i Vestfold. Det kjem i alt kring tusen delegatar, samt fleire tusen tilreisande deltakarar til samlinga, som har blitt ein av dei største kristne sommartreffa i Norden.
Erlend Berge
Dei siste to åra har vore prega av ei rekkje varslingssaker, og stor diskusjon og misnøye kring handteringa av desse. Det kulminerte då generalsekretæren gjennom nesten tolv år, Øyvind Åsland, måtte gå med få dagars varsel i vår, berre to månadar før generalforsamlinga. Åsland avviste at avgangen handla om varslingssakene. Hovudstyreformann Raymond Bjuland har uttalt at det handla om «ei heilskapleg vurdering».
Dei sterke frontane og høglydte debatten mellom anna i kristenpressa set kanskje ekstra djupe spor i ein organisasjon som er kjent for ein stor grad av lojalitet.
At eitt av forslaga som ligg på bordet er for fyrste gong i historia å opne for kvinner i eit toppstyre i organisasjonen, gjer også sitt til å auke både spenning og potensialet for høg temperatur på samlinga.
