Kvar sundag i hundre år har det vore gudsteneste på radio. Hundretusenvis av nordmenn har skrudd på radioen for å få lyden av kyrkjeklokker, bøn, salmar, bibellesing og preike frå kyrkjer i heile landet.
Sidan den første radiogudstenesta 28. desember i 1924, har sendingane gjeve eit viktig innblikk i heilt vanlege gudstenester i Den norske kyrkja. Og i høgtidene, særleg til jul og påske, samlar dei nordmenn og gjev julestemning for dei som ikkje sjølv går i kyrkja.
Tusenvis høyrer på
Dei siste åra har konseptet blitt utvida til å også vere sendt på TV. Takka vere ny teknologi kan NRK sende direktesende gudstenester på TV og radio med relativt små ressursar. Det er ei god vidareutvikling av radiogudstenesta, der ein no også kan få sjå kva som skjer i kyrkjerommet.
Den norske kyrkja er folkekyrkja i Noreg, slik det står i grunnlova, men samarbeid med andre kyrkjesamfunn er viktig. Sju prosent av innbyggjarane er medlem i eit kristent trussamfunn utanfor folkekyrkja – og difor er det verdifullt at radiogudstenestene på NRK også gjev innblikk i frikyrkjene.
I snitt høyrer meir enn 84.000 på radiogudstenesta, og i snitt ser 34.000 gudstenesta på TV.
I samband med 90-årsjubileet slo tidlegare kringkastingssjef, Thor Gjermund Eriksen, fast at NRK er det største kyrkjeromet i Noreg. Og han la til at formidling av slike program er ein del av NRK sitt oppdrag.
Gjenspegle arven
Sidan den gang har kyrkje og stat skilt lag, men det gjer det ikkje mindre naudsynt at NRK sitt tilbod skal gjenspegle den religiøse arven i Noreg og mangfaldet av livssyn. NRK er allmennkringkastar i eit livssynsope samfunn, bygd på kristne og humanistiske verdiar. NRK skal både formidle den kristne kulturarven – og samtidig romme eit større mangfald. Å sende gudstenester på TV og radio er ein viktig del av oppdraget. Det formidlar håp, og det gjev innblikk i den kristne kulturarven i Noreg.
Det som har bore kristen tru og tradisjon i landet vårt gjennom tusen år, er framfor alt kyrkja sitt gudtenesteliv. Den beste måten å formidle denne arven er å gjere gudstenester tilgjengeleg for radio- og fjernsynspublikummet. Gjennom åra har mange som av ulike grunnar ikkje har kunne kome seg til kyrkje, fått kyrkja inn i stova.
Nærkontakt med levande tru
Som allmennkringkastar skal NRK nå ut til mange ulike målgrupper. Difor er det bra at Festen før fasten har blitt fast TV-sending knytt til feiringa av den muslimske høgtida id. På NRK P1 byr programmet Kveldstanker på filosofi, livsvisdom og ord til ettertanke frå ulike religionar og livssyn.
Nærkontakt med levande tru, andre religionar og ulike livssyn kan bidra til mindre polarisering og meir forståing for kvarandre. I eit livssynsope må også NRK vere livssynsopen. Difor høyrer både kristne gudstenester, id-feiring og ulik filosofi heime i NRK sine flater.
Den første radiogudstenesta vart halden i romjula for hundre år sidan. Også i år har radiogudstenestene formidla julebodskapen, om at Gud sende sonen sin til verda. I dag feirar radiogudstenesta hundre år – og vi gratulerer!