Steng farvatnet, men hald grensa open

Dette er ein leiar. Leiaren gir uttrykk for Vårt Lands syn. Sjefredaktør og politisk redaktør har ansvar for innhaldet.

Fleire har tatt til orde for at Norge bør stengje grensa mot Russland ved Storskog i Aust-Finnmark, mellom anna Høgre og Frp. Førre veke stengde Finland grensa for russiske statsborgarar på turistvisum, medan russarar som søkjer asyl på grunn av krigen i Ukraina framleis kan finne tryggleik i landet.

Den norske justisministeren, Emilie Enger Mehl (Sp), har vore klar på at Norge vil halde grensa open for russarar som flyktar frå regimet. Klokt nok er det sett i verk fleire tiltak på grensa mot Russland for å hindre fri flyt. Fleire har til dømes uroa seg for om russisk etterretning kan skjule seg blant russarane som søkjer asyl i Norge. Auka tryggingstiltak på grensa er derfor positivt, så lenge grensa framleis vert halden open.

[ Betaler stadig større summer for eksterne podkaster. Så mye har NRK brukt siden 2020. ]

Norsk los på russiske skip

Det som derimot framleis er problematisk med tanke på norsk tryggleik, er at nokre russiske skip segler fritt langs norskekysten utan los. Det er dokumentert at skip som militærekspertar omtalar som «spionskip», har tråla norskekysten sidan juni. Russarane sjølv omtalar dei ni skipa som har farta rundt i Nordsjøen og Austersjøen som «forskingsskip». Det er grunn til å frykte at fritt leide i norsk farvatn for russiske skip kan bli misbrukt til sabotasje og spionasje.

For å skape moglegheit for eit nytt og betre Russland, må vi halde fram med opne grenser for russarar på flukt

—  Vårt Land

Eit minimumskrav bør derfor vere at russiske skip som framleis seglar i norsk farvatn, må ha norsk los om bord. I den aktuelle trugselsituasjonen mot kritisk norsk infrastruktur bør regjeringa få på plass eit så naudsynt tiltak omgåande.

Eit betre Russland

Likevel er det viktig å halde tunga rett i munnen. No er det avgjerande at vestlege land held fram med å ta imot russarar på flukt. Dersom krigen i Ukraina skal få ein slutt, og Russland ei betre framtid, er det av kritisk betydning at russarar som flyktar frå regimet vert tatt imot på ein god måte i vestlege land. Alternativet er at Putin-regimet kan nytte stengde grenser i sin propaganda, og sende fleire unge, russiske menn som kanonføde til Ukraina.

For å skape moglegheit for eit nytt og betre Russland, må vi halde fram med opne grenser for russarar på flukt.