Vi har fordommar mot folk vi ikkje kjenner så godt. Fordommane byggjer vi på dei verste historiene vi har høyrt. Om ungdom på vestkanten i hovudstaden, til dømes. Historier om dyre klede, pengejag og heime-åleine-festar gjev sikkert eit rett bilete av somme miljø. Men det er sjølvsagt ikkje heile sanninga.
Difor er det godt å sjå folk som knuser fordommane. Astrid Uhrenholdt Jacobsen på skilandslaget er ei skikkeleg vestkantjente. Vi kjenner henne etter strålande innsats i og utanfor sporet, og etter nokre ulukker i sporet – og grunna sørgebanda i Sotsji.
LES MER: Uhrenholdt Jacobsen finner ro i troen på Gud
Feil bilde
Uhrenholdt Jacobsen er ei vestkantjente som ikkje lever opp til fordommane om vestkanten. Med si kristentru har ho til dømes engasjert seg i Kirkens Bymisjon. Til Dagsavisen seier ho i eit intervju før renna i Holmenkollen denne helga: «Jeg tror mange har et feil bilde av Oslo Vest. At det bare er fjonge damer og folk som tenker på penger.»
Uhrenholdt Jacobsen sit til dømes i hovudstyret i idrettsklubben Heming. Ho snakkar varmt om engasjert frivillligkultur, stor dugnadsånd og grundig treningsarbeid i denne klubben som nettopp fylte 100 år. Langrennsjenta har også sagt frå offentleg om pengejaget i idretten: «Man trenger ikke reise utenlands og i høyden for å bli god. Man trenger ikke bruke masse penger på å bli god. Det er bare ekskluderende. Og husk: De beste blir ikke best uten de neste beste.»
Følg Vårt Land på Facebook og Twitter!
Heil ved
At vestkantungdom kan snakke slik! Ho er ikkje redd for å markere desse idrettspolitiske synspunkta, eller som ho seier til Dagsavisen: «Det er ikke farlig å mene noe. Så får andre mene noe annet.»
Astrid Uhrenholdt Jacobsen har kombinert landslaget med å komme seg halvveges i medisinstudiet. Det er godt gjort. Toppløparen håpar at universitetet seier ja til denne kombinasjonen vidare. I motsett fall ser vi ikkje Astrid Uhrenholdt Jacobsen på landslaget neste sesong. Det ville vore trist. I så fall mistar vi ei landslagsjente som landslagssjef Vidar Løfshus med rette kallar «heil ved». Vestkantungdom med slike verdiar gjer det heldigvis vondt i fordommane våre.