Vil utfordre dei minste

– I dag sparkast Miniøya i gang i Oslo. Kva skjer då, dagleg leiar Louise ­Winness Prestgard?

– Då opnar vi, og det er ein stor og viktig dag. Det store trekkplasteret er Knutsen og Ludvigsen-konserten, der fleire band skal framføre sine versjonar av deira songar. Vi er frykteleg stolte over at vi har fått til det.

– Miniøya er Noregs einaste festival med 16 år som øvre aldersgrense. Fortel litt om det.

– Viss du er over 16 år, så må du kome ifølgje med born. Om du er under 16 år, så må du kome med vaksne. Vi vil at små og store skal oppleve fine ting saman.

– På programmet står alt frå Skambankt til eventyrstund. Kva er viktig for dykk når de planlegg programmet?

– Å overraske og engasjere born. Skambankt er hard rock, men vi trur born likar å bli utfordra. Dette er musikk dei vanlegvis ikkje har tilgang på.

Følg oss på Facebook og Twitter!

– Korleis trur du det er å spele for det unge publikummet på Miniøya, kontra dei som er på ein festival med 18 års grense?

– Nokre av artistane er litt skjelvne i beina, for dei er ikkje vande til å spele for eit edru ­publikum. Men etterpå seier dei at det er ei kjempekul oppleving. Born er spontane og ærlege. Dei klappar gjerne allereie på første refrenget.

– Festivalleiarane er svært unge. Den yngste er sju år. Kva rolle spelar borna i arrangeringa av festivalen?

– Dei er med på førebuingane gjennom heile året, og dei er med på å bestemme alt frå artistar til kva mat vi skal ha. Vi kan ikkje lage festival utan dei. Born veit best kva born vil ha.

– Kva har overraska deg mest den siste veka?

– Dei frivillige under festivalen. Dei kjem tilbake år etter år og jobbar som heltar.

– Når gjorde du sist noko for ­første gong?

– Eg snakka i samband. I sånn walkie-talkie, på festivalområdet her.

Av: Anita Grønningsæter 
Digernes