Kan ei mor vera ein far?
Kan ei kyrkje vera ein ruin?
Kan månen erstatta sola
nettene og friskmelda
oss frå dagane
bak lukka dører
og skitne glas?
Kan du som mettar
liten fugl med to fiskar
og fem små brød
gi oss som trur
me svelt medan me et
og snakkar på eit språk
me ikkje sjølv forstår
gi oss språket og håpet
attende før du forlét
oss slik at me
etter innestengde
dagar og netter
kan sjå oss sjølve
i spegelen som menneske?
Gi oss i dag brødet
me kan dela.
Gi oss i dag handa
som kan halda andre hender.
Gi oss våren inn i sommaren
der me vitjar naboen sysken
besteforeldre
som ei mor eller ein far
me alltid har visst om.
Slik ble teksten til
Forfatter Inger Bråtveit:
– Då eg møtte Knut Erik Tveit til befaringa i Mariakirkeruinen fredag den trettande mars, heldt Norge på å stengja ned. På befaringa, der dotter mi, sidan skulen var stengd, også var med, heldt me ein meters avstand. Me stod og stirde på ein ruin, som hadde vore ei kyrkje og ei stasmakt, som i si tid vart sett i brann av svenskane.
– Kyrkja låg perfekt til, rett ved vasspegelen ved Oslofjorden. Eit landskap med gravemaskinar og skrekkodar skugga no for sola. Seinare vart avstandsregelen utvida til å gjelda to meter, og me gjekk inn i unntakstilstanden som framleis, trass gradvis gjennopning i landet, gjeld.
– Det er frå denne unntakstilstanden og såkalla kvardagen diktet er skrive, der spørsmåla i diktet endar opp med å verta ei bøn. Fyrst kjende eg det som om det ikkje fanst ord. Så tenkte eg, korleis kan me møtast att etter dette?
– Mennesket er ikkje noko øy. Menneske treng menneske. Gjennom desse dagane har eg som mor avlært barnet mitt noko av det viktigaste me som foreldre ein gong prøvde å læra barna våre: Å vera ein venn. Altså eit medmenneske som tek kontakt.
– Korleis vert dagane etter dette? Eg veit ikkje, men kjenner både redsle, håp og utmatting i våren som akkurat no her, fem hundre meter frå Mariakirkeruinen, på eit underleg vis har gått over i ein slags sjuk sommar med tjue pluss grader. Det er naturstridig om dette varer.
– Diktet er skrive ut av like delar med håp og tvil, frå ein fortvila kvardag inn mot påskehøgtida, frå ein vinter på bar bakke inn mot våren, i håpet om sommaren.
---
4-4 tekst
- Fire forfattere er invitert av Påske & Pasjon til å lese Markus-evangeliet og besøke Mariakirkens ruiner i Oslo, før de skriver en tekst.
- 4 – 4 utforsker stedet Mariakirkeruinen og situasjonen Påskeaften.
- Årets tekster er skrevet av Inger Bråtveit, Marie Aubert, Ida Hegazi Høyer og Steinar Opstad.
- Inger Bråtveit har skrevet dagens dikt.
---