Jordnær glamour skal inspirere
Ny serie frå NRK skal vise eit anna bilde av unge kvinner med minoritetsbakgrunn.
Vita og Wanda Mashadi vil vise at dei bak fasaden på sosiale medium er heilt vanlege jenter.
I dag lanserer NRK dokusåpeserien Vita & Wanda, om tvillingsøstrene Vita og Wanda Mashadi, som lever travle liv med jobbar i motebransjen og festing på kveldstid. Dei har foreldre frå Iran, men er sjølv oppvaksne i Noreg.
NRK har følgd dei over to år, og vi får bli med på deira oppturar og nedturar: då Vita opererer nasen sin i Iran, då søstrene skal feire 25-årsdagen sin og då dei vitjar heimbygda si ved Kongsvinger og minnest vanskelege tider prega av mobbing og dårleg sjølvtillit. Dei vil vise fram eit anna bilde av unge kvinner med minoritetsbakgrunn enn det som støtt blir synt fram i media.
– Dette er jordnær glamour, fortel regissør Noman Mubashir.
