Lårene. Pikkene. Berømmelsen.
Slik er gangen i monolog-framsyninga Dritt//La Merda, som Helga Guren har vunne prisen for beste kvinnelege skodespelar med. Dramatikar Cristian Ceresoli har kalla stykket for ein tragedie i tre satsar, men ikkje fordi det går ille med den kvinnelege protagonisten.
– Ho vinn ho, i sine auge, seier Guren. – Men sett utanfrå gjer ho jo absolutt ikkje det. Stykket vekslar mellom ærlig brutalitet og ein veldig humor i framstillinga av kva ho er villig til å gjere for å oppnå suksess.
Meir ubehag i Oslo
Vi møter Guren på veg heim til Stavanger, der ho er busett saman med familien sin. I samband med Heddadagane har ho vore ei veke i hovudstaden, der Dritt//La Merda, i Audny Chris Holsen sin regi, vart sett opp på Oslo Nye.
Under desse siste framsyningane har skodespelarinna måtte ta stilling til ei utfordring som ikkje var der då stykket fyrst gjekk på Rogaland teater. 33-åringen ventar nemleg barn i august – og skulle stå naken på scena under framføringa.
– Eg trur og håper at det gjorde det enda meir ubehagelig for publikum, seier Guren.
– Men på ein god måte. Den gravide kroppen opnar jo opp for eit anna lag av assosiasjonar. Det er eit lite liv som skal inn i denne verda, som frå protagonisten sitt synspunkt ser ganske dårlig ut.
For Guren sin eigen del var det også noko fascinerande – og frigjerande – reint kroppsleg ved å stå gravid på scena.
– Eg kjende meg meir som eit dyr. Kroppen er liksom ikkje min akkurat noko, det er noko anna som driv og tek bustad i den.
LES MEIR: River Ibsen i biter
Kvinnene er ikkje offer
Guren omtalar monologen ho har framført som kritisk til det kommersielle samfunnet generelt, og kommersialiseringa av kvinnekroppen spesielt. Oppsetninga hadde premiere i 2012, altså nokre år før den mykje omtalte metoo-bølga.
– Metoo er reaksjonen på det helvetet som kvinna i stykket går gjennom, seier Guren.
– Eg trur den reaksjonen var heilt nødvendig, for det skjer mange maktovergrep. Både frå kvinner og menn har eg opplevd det.
Trass i denne maktubalansen meiner heddaprisvinnaren likevel at kvinner ikkje berre er offer i metoo-sakene.
– Stykket er like mykje ein kritikk av kvinnene som vel å bruke kroppen sin for å kome seg opp og fram - og då særleg samfunnsstrukturane som legg til rette for dette. Det er ikkje nokon som tvingar protagonisten, ho vel å gjere det ho gjer.
LES MEIR: Friskt barneteater om å være født i feil kropp
Streng regi
Ein kritikk som har vore retta mot Dritt//La merda er at framsyninga har svært strenge føringar på regien frå dramatikar Ceresoli si side. Til dømes når det gjeld kravet om å framføre monologen naken.
– Er det nødvendig å tvinge skodespelarinna, i dette tilfellet deg, til å stå på scena utan klede?
– I utgangspunktet er eg skeptisk til nakenheit som verkemiddel i kunst, men her meiner eg det er eit viktig grep, som er integrert i kunstverket, og aldri blir spekulativt. Med klede hadde kvinna representert eit sjikt i samfunnet, mens den nakne kroppen i større grad gjer henne universell. Grepet framkallar også ein unik konsentrasjon både for meg og publikum – som faktisk gjer at teksten kjem betre fram.
Eiga initiativ
– Men kva tenkjer du om at den mannlege dramatikaren set dette som eit krav til den kvinnelege skodespelaren?
– Faktisk så var det ikkje Ceresoli som bestemte dette kostymet, men skodespelarinna Silvia Gallerano. Det var ho som spelte protagonisten i den opphavlege framsyninga. Og det er eg sjølv som har tatt initiativet til å gjere denne viktige teksten, så eg var klar over kva det innebar.