– Gullalder for norsk dokumentarfilm
FILM: Med Margreth Olins «Fedrelandet» er Norges offisielle Oscar-kandidat for første gong ein dokumentarfilm. Valet speglar det høge nivået i sjangeren, meiner ekspertar.
Margreth Olins dokumentarfilm «Fedrelandet» er vald ut til å vere Noregs offisielle Oscar-kandidat. – Filmen skal minne oss på den djupe relasjonen vi har til naturen, seier filmskaparen.
Rebekka Johannessen Litland
– Det er ei stor ære å få vere den første dokumentarfilmen til å representere Noreg i kategorien beste internasjonale film. Det er historisk, seier Margreth Olin.
Den norske Oscar-komiteen meiner at Olins dokumentar Fedrelandet har ein sjanse til å hevde seg i det sterke landskapet av kvalitetsfilmar frå heile verda. Fedrelandet krinsar rundt Olins far, Jørgen Mykløen, og heimstaden hans i Oldedalen i Nordfjord. Dokumentarfilmen byr både på eksistensiell refleksjon og mektige naturskildringar.
– Eg er glad på vegne av heile det kunstnariske laget som har arbeidd med filmen, og på vegne av far min, seier Olin om det norske Oscar-kandidaturet – vel vitande om at det ligg mykje arbeid framfor henne for at filmen faktisk skal bli nominert til ein Oscar.
