Hillsong-pastor: – Vi må vere smarte

– Eg veit at det er fleire pastorar som har gått saman for å diskutere korleis vi kan fortelje dei gode historiene i møte med denne filmen, seier Hillsong-pastor, David Hasseløy.

Basert på traileren ser Hasseløy at filmen kan ha likskapar med kyrkja han er pastor i.

– Traileren viser openbert at inspirasjonen er henta frå ei moderne frimenigheit.

– Er de bekymra for korleis filmen presenterer moderne frimenigheiter?

– Det ser ut til at det ikkje er berre gode opplevingar som blir vektlagt. Eg vil ikkje seie at eg er bekymra, men vi må vere smarte og tenke på korleis vi kan fortelje alt det positive som skjer.

Sterk avstand

Filmen tar for seg to kristne miljø. Det første tar plass i menigheita «Friheten», medan det andre er eit meir sektprega miljø som drar på sommarleir. Sistnemnde tar Hasseløy sterk avstand frå.

– Ein film vil jo fokusere på ytterpunkta. Det handlar ikkje om neglisjering av at folk har hatt vonde opplevingar, men det er viktig for oss å fortelje at det hovudkarakteren opplever i sekta, ikkje er noko vi kjenner oss igjen i.

For Hasseløy meiner det er god kultur for å snakke om dårlege opplevingar i menigheita hans.

– Vi har hatt debattar om det å ha dårlege opplevingar med kyrkja og kristendomen. Det tar vi på alvor. Vi må tole å snakke om dette og vi må ta på alvor det folk seier dei har opplevd.

LES OGSÅ: Kjent Hillsong-musikker tar oppgjør med kristendommen

Jobbar for sunnheit

Framfor å klage på media si framstilling av kristne miljø, vil Hasseløy jobbe vidare med å halde det sunt i Hillsong.

– Korleis media framstiller kristne miljø, må vi kunne leve med. Så skal vi skape sunne kyrkjer kor folk kan vekse i tru. Vi jobbar knallhardt for å halde det sunt. Vi har sett folk frå gjengmiljø kome til oss og få ei positiv endring i livet, og at trua har blitt eit godt fundament.

– Skal du sjå filmen sjølv?

– Det kjem eg heilt sikkert til å gjere.