Edvardsen endar fort opp i kontroversar når han prøver å hjelpe

– Eg har ikkje alltid vore det beste eksempelet. Eg har 46 sting i panna frå då eg var 15 og kjøpte ein gammal, amerikansk bil ilag med ein kompis. Vi hamna i eit tre etter 600 meter. Det var han som køyrde.

Krasjet sto ikkje heilt i stil til det å vere son av den velkjende predikanten, Aril Edvardsen. Elles var det greitt å vere evangelistson i Kvinesdal.

– Eg fekk moglegheit til å vere Rune frå dag ein og blei aldri tvungen til å vere noko eg ikkje ville.

Lytt til podcasten her: 

LES OGSÅ: Kristenleiarane tar misjon i forsvar på Olavsfestdenene

Raude Rune

Det vart eit himla oppstyr då det kom fram at Edvardsen hadde røysta på Arbeidarpartiet. Han skulle heller sett at journalistane brydde seg med andre ting.

– Eg stakk nasen litt fram og oppdaga at av og til er det greitt å halde han inne. Eg hadde akkurat kome heim frå ein kampanje i India kor 30 000 folk hadde blitt truande. Det var ikkje interessant. Dei var meir opptekne av at eg hadde stilt opp på bilete med den og den. Det stod mykje om meg i Dagen på denne tida. Dei kalla meg for raude Rune, eg som er så bleik.

– Trur du Jesus hadde stilt opp i Pride?

– Eg er stygt redd for at han hadde gjort det, sjølv om eg ikkje akkurat hadde likt det. Jesus er mitt forbilde, men eg er ikkje alltid like tøff som han.

LES OGSÅ: Rune Edvardsen ville ikkje latt hunden sin bu i flyktningleirane i Irak

Skulda for løgn

Edvardsen har òg vore sentral i den kontroversielle Kongo-saka om dei to norske leigesoldatane Tjostolv Moland og Joshua French. I Fredrik Græsviks bok «Dømt til døden i Kongo», blir han skulda for løgn. Sjølv meiner Edvardsen han har sitt på det reine.

– Eg vart veldig lei meg. Eg har ikkje gjort noko gale. Eg har gjort mitt beste og blitt truga på livet fleire gongar og tapt mine eigne pengar på denne saka.

I dag er han ikkje sikker på om han ville gjort det same ein gong til.

– Denne saka var eit vepsebol. Sjølv om det var mykje lærerikt og flott som skjedde, er det ikkje sikkert eg ville gjort det igjen.