– Det er få som veit noko om kvifor denne bydelen heiter Klosterøya, for det finst ingen ruinar eller leivningar etter klosteret, seier forfattar Aina Villanger.
Fem år er gått sidan ho debuterte med diktsamlinga langsang. et flytans habitat i 2012. No er ho aktuell med prosaverket Baugeids bok.
Villanger er sjølv frå Skien og har lenge hatt lyst til å skrive om Klosterøya, eit viktig historisk område, blant anna grunna papirfabrikken som vart bygd der i 1873. Ho søkte til kommunen om prosjektstipend og fekk det. Men då ho byrja å lese i det historiske materialet, skjønte ho at det ikkje var fabrikktida ho ville skrive om.
Ei setning i Snorre
Eit stykke ovanfor papirfabrikktomta stod benediktinarklosteret Gimsøy fram til det brann 1546. Det vart truleg oppretta i første halvdel av 1100-talet av lendmann Dag Eilivsson etter at han hadde vore med Sigurd Jorsalfare til Jerusalem og Konstantinopel.
– Det er skrive ein god del om Dag Eilivsson og sonen Gregorius Dagsson i Snorres kongesagaer, fortel Villanger.
Dottera Baugeid Dagsdatter står det lite om, men ho er nemnd i ei setning.
– Dette namnet lyste imot meg, og eg visste at eg ville skrive om henne.
Boka er ei samansetjing av prosatekstar: Det er tilsynelatande autentiske notisar om ulike saksforhold og lister av råd og reglar for korleis ein skal kle seg og te seg, det er prosa i sagastil og høgtidelege, nærmast svulstige passasjar om religiøse visjonar. Til saman fortel dei historia om ein sjukleg jentunge som blir send til England for å gå i kloster — ho eignar seg kanskje ikkje til å vere mor og kone. Som vaksen kvinne kjem ho heim att til Noreg for å bli abbedisse ved det nyoppretta Gimsøy kloster.
– Kva som gjorde at akkurat ho enda opp i kloster, kan vi ikkje vite, berre tenkje oss til, seier Villanger.
LES OGSÅ: Elleve kvinner konfirmeres
Gud og naturen
Det er ikkje noko tydeleg skilje mellom kristendom og heidendom for bokas Baugeid. Ho er oppvaksen i ein heidensk tradisjon, og det er faren som tar med seg kristentrua tilbake frå Jerusalem. Mora held fram med å be til Tor og Odin.
– Denne dobbeltheita ligg allereie i namnet hennar, seier Villanger, og viser til etymologien.
– Baugeidr er eiden ein svor ved den heilage stålringen som låg på pallen i heidenske gudehov. Broren Gregorius, som blir viking, har derimot eit kristent namn.
Villangers Baugeid er nært knytt til naturen og har lært av urtekona i bygda korleis ho kan nytte han til å lækje. Samstundes er ho nært knytt til jomfru Maria. For Baugeid høyrer dei to tinga saman. Det heidenske og det religiøse flyt over i kvarandre, utan ho føler seg splitta av den grunn.
Guddomskrafta ligg nettopp i naturen, dei religiøse visjonane får ho der, ikkje i klosteret.
– Kanskje var den svakheita som prega henne, heller ein type sensibilitet som kunne opne for kontakt med det åndelege, seier Villanger.
– Baugeid får visjonar av Adam i Paradis, av Maria og Jesusbarnet, av dommens dag. Men det verkar ikkje som ho har noka oppfatning av ein dømande Gud, slik ein kanskje ser for seg at folk hadde i mellomalderen?
– Dette var så tidleg i kristendommen i Noreg, før han hadde sett seg ordentleg og skapt strenge rammer.
LES OGSÅ: Nonnen får kirke i gave
Kropp og sjel
Koplinga mellom kropp og sjel er først og fremst psykosomatisk. Fleire stader i boka er det oversikter over kva urter som kan hjelpe på humør og sinnsstemning i ymse situasjonar. «Havrerødder (ved redsel for å se en ond ånd)» er eit av ernæringsråda for åkerarbeidarar. Det finst også råd for dei som vever, mot lastar, for fremjing av dydar, og mykje meir. Men det står lite om sjela og evig liv.
– Eg er usikker på kor religiøs Baugeid eigentleg var, om ho tenkte at ho skulle leve vidare i paradis. For kvinner kunne klosteret vere ein måte å sleppe unna det å gifte seg og få barn på, meir enn det var eit ønske om gudsdyrking, seier Villanger.
Det kroppslege og det sanselege er svært present på ein heilt naturleg måte i livet til Baugeid. Og den kvinnelege seksualiteten er ikkje knytt til skam, korkje onani eller orgasme.
– Eg er opptatt av overskriding som skjer i det fysiske, konkrete. Orgasmen er den mest transendente og samtidig mest kroppslege erfaringa vi som menneske kan ha.
– Her kan det synast som mellomalderkvinnene hadde eit meir naturleg forhold til kvinnekroppen enn det vi har i dag?
– Vi veit lite om kvinner i denne perioden, utover det at det var ei veldig fruktbar tid for kvinner. Det var større rom for at dei kunne ha maktposisjonar enn det blir seinare, og Maria-dyrkinga er nok ein viktig faktor. Kanskje var desse tinga mindre skamfulle?
Det er umogleg å sjå tilbake på denne perioden med eit anna blikk enn det som er farga av samtida vår og alt vi veit om tida etter, meiner Villanger.
– Er dette eit forsøk på historieomskriving?
– Det er ei problematisering av kva historia er, og det er liksomautentisk — ikkje eit historisk saksforskingsprosjekt.