To måtar å vere mann på
Dei to visepresidentkandidatane i USA viser oss, anten dei meiner å gjere det eller ikkje, to tilnærmingar til mannsrolla som står i sterk kontrast til kvarandre.
KAMPKLARE: JD Vance (t.h.) og Tim Walz skal møtast til debatt natt til onsdag norsk tid.
NTB
Natt til 2. oktober skal visepresidentkandidatane Tim Walz og JD Vance møte kvarandre til debatt i New York. Ein av tinga eg let meg fascinere av når eg ser på dei to, handler om korleis dei viser fram ulike måter å vere mann på. Eg er spent på å sjå om dette vil komme fram også i debatten tysdag natt.
På mange måtar er det mogleg å seie at den amerikanske mannen er i krise. På stadig fleire felt heng menn etter, akkurat som i Norge. Gutar fell bak jenter i skuleresultat, og på universitet nærmer det seg å vere to kvinnelege studentar for kvar mannlege. Menn lever kortare enn kvinner, og har langt høgare sjølvmordsrate. Menn er også overrepresenterte på statistikkar over arbeidsløyse, narkotikaoverdoser og alkoholisme.
I målingar viser det seg at færre menn i generasjon Z (fødd etter 1996) kallar seg feministar enn menn i generasjonen over (fødselsår 1981–1996). I dei same undersøkingane seier nesten halvparten av menn i alderen 18–29 år at dei opplever å møte diskriminering fordi dei er menn.
