Eitt bilete kan lyge meir enn tusen ord
EU er klare for sluttforhandlingane om verdas første lovverk for kunstig intelligens. Men klarer politikarane å hindre at vi blir eit samfunn av datamanipulerte pornostjerner?
ILLUSTRASJON:
Sunniva Sunde Krogseth
Eitt bilete seier meir enn tusen ord, heitte det i gamle dagar. Med inntoget av datateknologi og kunstig intelligens er det blitt vanskelegare enn før å stole på det du kan sjå med dine eige auge. Utviklinga kan føre til alvorlege problem. Eitt bilete kan lyge meir enn tusen ord.
Enn så lenge lar vi oss fascinere. Kanskje har du som meg sett den nye Indiana Jones-filmen i sommar? I starten av filmen fekk vi servert forrykande action utført av ein ung Harrison Ford – der han ser prikk lik ut som i storfilmane frå 1980-talet.
Korleis er det mogleg? Jo, ved bruk av kunstig intelligens. Filmprodusenten Lucasfilm tok utgangspunkt i alt filmmaterialet dei allereie hadde av Ford, og klarte såleis å gjenskape 81-åringen som ung actionhelt.
