Kristne organisasjonar let ikkje usikker statsstøtte hindre sommaraktivitetar for barn og unge
KORONA: Fleire kristne organisasjonar har god tru på ein sommar med aktivitetar, festivalar og leirar for barn og unge. Generalsekretæren i KFUK-KFUM er overraska over kor frustrerte andre organisasjonar er over usikker statsstøtte. Sjølve planlegg dei fleire nasjonale arrangement.
FESTIVAL: Kristne organisasjonar håpar på ein sommar full av aktivitetar for barn og unge. Her frå Skjærgårds music and mission festival på Risøya mellom Risør og Tvedestrand.
JOAKIM S. ENGER
– Me er privilegerte i Noreg som får offentlege ressursar til å sikre tiltak for barn og unge under korona, meiner generalsekretær i KFUK-KFUM, Øystein Magelssen.
Han seier dei langt på veg har unngått det frykta korona-krakket på grunn av staten sine stimulerings- og kompensasjonsordningar. Dei planlegg enn så lenge at deira faste arrangement skal gå som normalt, sjølv om dei er førebudde på smittevernkrav. I tillegg legg dei, som i fjor, opp til ein auke i ferieaktivitetsprogrammet sitt, for å svare på barn og unges særskilte behov under pandemien.
Foreløpig har KFUK-KFUM berre avlyst konfirmasjonsfestivalar som dei måtte ta stilling til i august 2020. No ventar dei spent på nye signal frå regjeringa i neste veke. Men endeleg avgjersler for leirar, treff og andre aktivitetar tek dei ikkje før i midten av juni.
