Nyheter

Tyrkia strammar til mot journalistar

Tyrkia fordømmer Charlie Hebdo-drapa. Men styresmaktene i landet tåler få kritiske ytringar mot eige regime.

Tyrkias president Recep Tayyip Erdogan var sterk i fordømminga av drapa i redaksjonen til satire­magasinet Charlie Hebdo – eit «avskyeleg terrorangrep», sa han i ei fråsegn.

På heimebane trer eit anna ­bilete fram når media kritiserer regimet til Tyrkias sterke mann i snart 12 år; statsminister frå 2003 til 2014, og president ­sidan i fjor. Som statsminister var Erdogan villig til å stengje ­Facebook og YouTube etter at det hadde blitt publisert lydopptak som skulle vise at han og sonen korrupte. Erdoğan slo tilbake og sa at opptaka var fabrikkerte – og saka rann ut i sanden.

SE VÅRT INTERAKTIVE VERDENSKART: Frie ytringer under press

Den globale pressefridomen har falle til det lågaste nivået på over eit tiår, seier Freedom House i 2014-rapporten. Den anerkjende amerikanske organisasjonen leverer kvart år oversikten Freedom­ in the World. Karin Karlekar er prosjektdirektør for rapporten – og bekymra for utviklinga:

– Globalt ser vi nedgang i mediafridom. Styresmakter vil kontrollere bodskapane og straffe bodberarane.

Karlekar fortel at dei ser negative utviklingstrekk i alle verdsdelar. I 2014-rapporten blir 63 land karakteriserte som «frie», 68 som «delvis frie» og 66 som «ikkje frie».

I Europa flytta Freedom House eit land til gruppa av «ikkje frie»: Tyrkia.

På ein annan fersk pressefridomsindeks kjem Tyrkia også langt ned. Reporterar utan grenser rangerer landet på 154. plass i 2014-rapporten. Bak seg har Tyrkia berre 26 land, og ingen andre europeiske statar.

Følg oss på Facebook og Twitter!

Arresterer journalistar

Ei rekkje hendingar dei siste ­vekene fortel kvifor pressa har ­vanskelege kår i Tyrkia:

• Terrorpolitiet arresterte ein nederlandsk journalist sist veke, og ransaka huset hennar. Fredrike Geerdink dekkjer konflikta mellom regjeringa og kurdarane. Politiet klaga journalisten for «propaganda på vegne av ein terrororganisasjon» - før dei sleppte henne.

• Ein annan nederlandsk journalist, Mehmet Ulgur - som har tyrkisk bakgrunn – blei sist veke arrestert på flyplassen i Istanbul. Han blei halden i varetekt i fleire dagar, og er pålagt å møte for ein domstol 21. januar.

• Journalisten Sedef Kabas blei i desember henta av politiet og avhøyrt etter at ho publiserte ei melding på twitter der ho oppmoda folk om ikkje å gløyme namnet på dommaren som avgjorde at det ikkje skulle reisast sak mot Erdogan, sonen og fire statsrådar, som var skulda for korrupsjon.

• Tyrkisk politi gjekk i desember til aksjon mot ei avis og ein TV-stasjon og arresterte minst 25 personar. Avisa Zaman og TV-stasjonen Samanyolu har nære band til ein av Erdogans fremste politiske kritikarar. Zaman har markert seg som ein tydeleg kritikar av Tyrkias fremste leiar.

Både Eog USA refsa førjulsrassiaen mot opposisjonsmedia og krev at Tyrkia respekterer pressefridom og demokratiske verdiar.

– Politiraida og arrestasjonane av ei rekkje journalistar og representantar for pressa i Tyrkia er uforeinleg med pressefridomen, som er eit grunnleggjande demokratisk prinsipp, sa EUs utanrikssjef Federica Mogherini.

President Erdogan likte ikkje refsen:

- EU kan ikkje blande seg inn i tiltaka som er gjort innafor lova, mot element som truar vår nasjonale tryggleik, sa Erdogan i ein TV-sendt tale.

– Dei burde passe sine eigne saker, la han til – og rosa arrestasjonane av journalistane og kalla dei «ryddige og rettvise prosessar».

LES MER: 950 piskeslag gjenstår

Sjølvros av fri presse

I det 2014 gjekk mot slutten, steig Erdogan opp på ein talarstol i Ankara og forkynte at kritikken om manglande pressefridom i Tyrkia er urimeleg:

– Tyrkia har den friaste pressa i verda, sa politikaren som i 1998 blei avsett frå vervet som borgarmeister i Istanbul og dømt til fire månader i fengsel for å ha lese eit kontroversielt dikt høgt.

Kartleggingar utført av presseorganisasjonen Reporterar utan grenser viser at Tyrkia er blant dei ivrigaste landa når det kjem til fengsling av journalistar. Mange blir sitjande månader og opptil år i fengsel utan at saka kjem opp for retten.

I morgon skal EU-parlamentet handsame mangelen på pressefridom i Tyrkia. Som følgje av massearrestasjonen i desember vil parlamentet vedta ein resolusjon som fordømmer mangelen på pressefridom i landet som gjerne vil inn i EU.

Reagerer på medvandrerar

Då Frankrike sundag demonstrerte mot Charlie Hebdo-drapa, var det mange statsleiarar som ville ved med. No reagerer franske journalistlag på at menn som strammar inn pressefridomen i eigne land, deltok i solidaritetsmarsjen, side om side med president François Hollande.

Blant desse var Gabons president Ali Bongo, Ungarns statsminister Viktor Orbán – og Tyrkias statsminister Ahmet Davutoglu.

Les mer om mer disse temaene:

Bjørgulv K. Bjåen

Bjørgulv K. Bjåen

Bjørgulv K. Bjåen er journalist i nyhetsavdelingen i Vårt Land.

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter