Dyrevernaktivistar i Austerrike går til retten i ei sak som kan få vidtrekkjande følgje for kampen for dyrerettar: Dei krev at den 26 år gamle sjimpansen skal bli tilkjent status som person.

Støttespelarane til Hiasl argumenterer med at han treng personstatusen for å verte ein juridisk einskap som kan ta imot donasjonar og få ei verje som kan sikre interessene hans, melder telegrambyrået Associated Press (AP) frå Wien.

Rettar

– Det viktigaste argumentet vårt er at Hiasl er ein person med grunnleggjande rettar, seier Eberhart Theuer. Han er advokat som leier rettsprosessen på vegne av Organisasjonen mot dyrefabrikkar, ei dyreverngruppe i Wien.

– Vi meiner retten til liv, retten til ikkje å bli torturert, retten til fridom under visse vilkår, seier Theuer til AP.

Men rettane skal ha si grense: Hiasl ber ikkje å stemmeret

Manglar pengar

Saka vart reist tidlegare i år då dyrereservatet der Hiasl og dama hans, Rosi, heldt til, gjekk konkurs. Aktivistane ville ikkje at dei to sjimpansane skulle ende opp i ein zoologisk hage eller i eit laboratorium, heiter det på Primatology.org.

– Dersom dei vert sende ut av Austerrike, kan alt hende, seier dyrevernsleiaren Martin Balluch.

Dyrevernaktivistane seier at dei to apene har hatt traumer nok: Dei vart fanga i Sierra Leone som apebarn og smugla til Austerrike for å bli utsette for medisinske eksperiment i eit farmasøytisk laboratorium.

Og det kostar 5.000 euro eller vel 40.000 kroner i måmaden å halde dei med mat. Gode hjelparar vil stille opp, men det er berre personar som kan ta imot slike donasjonar, ifølgje AP.

Absurd

Og var det ikkje evolusjonen, dette, at vi stammar frå apene? Balluch viser til at sjimpansen og menneska har 99,4 prosent av arvestoffet felles.Men det finst også dyrevernaktivistar som meiner rettssaka er absurd.

– Eg vil ikkje sjå ut som ein tosk ved å bli involvert i dette, seier Michael Antolini. Han leier ein annan dyrevernorganisasjon.Hiasl vann ikkje fram i første runde. Ein dommar sa nei til kravet om verje. Men avgjerda er anka, melder Primatology.org.

Kyss og klem

Paula Stibbe, ei britisk kvinne som bur i Austerrike, er den som var utpeikt til juridisk å bli verje for Hiasl.

– Eg ser på han som ein ven. Han helsar meg med kyss og klem, seier ho.