– Vi vil skrive noregshistorie

– Eg trur det kjem mellom 20 og 200 menneske, seier initiativtakar og tidlegare lærar Max Jarl Hermansen (55) om marsjen måndag kveld.

Pegida står for Patriotiske europearar mot islamiseringa av Vesten. Protestrørsla har fått mykje merksemd etter å ha arrangert store demonstrasjonar i Tyskland kvar veke sidan oktober i fjor. På det meste samla dei 18.000 menneske i Dresden.

– Nå skal vi marsjere kvar måndag, på ubestemt tid, seier Hermansen, som trur at hendingane i Frankrike førre veke vil bidra til å styrke oppmøtet.

Marsjen startar ved Rådhuset i Oslo klokka 18.30.

LES OGSÅ: Pegida skal marsjere i Norge

– Vi blir sabla ned

Gjennom sosiale media har Hermansen prøvd å nå ut til folk om demonstrasjonen sidan førre tysdag. I skrivande stund har Facebook-hendinga 128 deltakarar. 73 personar kjem «kanskje».

Ideen om å organisere Pegida-marsjar i Noreg kom etter at Hermansen såg fjernsynsprogrammet Urix på NRK.

– Det var eit program mot Pegida, ikkje om Pegida, meiner han.

Initiativtakaren skulle gjerne delteke meir i samfunnsdebatten.

– Det er mange som har prøvd å påpeike dei generelle problema med muslimsk innvandring og påverknad frå islam, men dei når ikkje fram. Vi blir sabla ned av media, politikarar og sokalla antirasistar, hevdar han.

– SIAN er velkomne

Pegida-demonstrantar i Tyskland har gått i takt til slagordet «Vi er folket!». Det vil Hermansen ta med seg til Oslos gater.

– Det er ein enkel og grei bodskap. Vi vil skrive noregshistorie i kveld, seier han.

– Men korleis skil eigentleg Pegida seg frå organisasjonar som til dømes SIAN (Stopp islamiseringen av Norge)?

– Pegida er eit folkeleg engasjement. Vi er ei protestrørsle. Det er hovudskilnaden, seier Hermansen.

Bortsett frå det er ulikskapane få, ifølgje han.

Følg oss på Facebook og Twitter!

– Vi er klare i vår bodskap. Problemet i vårt samfunn er muslimar. Det er feigt å seie at det er innvandring generelt. Vi lever ikkje i eit fleirkulturelt samfunn. Det er fascismen som er på veg inn, hevdar han, og legg til:

– Alle frå SIAN er hjarteleg velkomne til å gå saman med oss i kveld. Men ikkje med SIAN-flagg.

Måndagens marsj skal, ifølgje Hermansen, vere fri for banner. Dei vil berre ha med norske flagg.

Trur på fleire, lokale marsjar

Vi snakkar med Hermansen i om lag ein halv time, inne i bruktbokhandelen som han driv saman med sonen. På den tida ringer telefonen hans fleire gongar. NRK, Sveriges Radio – og vanlege folk, som er nysgjerrige på marsjen.

– Det er mange som beklagar at dei ikkje kan kome, fordi dei bur for langt unna. Då er mitt svar: Organisér lokale marsjar!

Hermansen sitt eige engasjement byrja då han var lærar på ein vidaregåande skule.

– Eg hadde elevar som meinte at alle jødar kunne forsvinne frå jordas overflate. Eg trur det er mange som meiner det same som dei. Og eg trur dei er villige til å bruke vald, seier Hermansen.

Han er sikker på at lokale Pegida-marsjar vil bli arrangert etter kvart, over heile landet.

Politiet: Vi følgjer med

Ved Oslo politidistrikt er dei merksame på kveldens demonstrasjon, men kan førebels ikkje seie noko om kva dei forventar.

– Vi kjenner til Pegida-demonstrasjonen, og at det er varsla motdemonstrasjonar, og vi vil vurdere oppfølginga vidare. Vi har ingen konkrete planer nå, men følgjer med, seier operasjonsleiar Vidar Pedersen ved Oslo Politidistrikt.