Den fire månader gamle guten hadde ein sjeldan genetisk sjukdom som gjer at huda fall av. Han kunne kanskje blitt tre fire år. Men det ville vore særs smertefulle år, meiner Eduard Verhagen.

Ernæring er vanskeleg med sonde i halsen eller endå vanskelegare med sonde gjennom den ekstremt sårbare huda rett i magen.

– Eit perfekt døme på håplaus og endelaus liding, hevdar Verhagen.

Ikkje tiltala. Difor måtte Verhagen i desember i fjor rapportere til påtalemakta sitt femte tilfellet av aktiv dødshjelp på eit lite barn.

For ein månad sidan kom svaret: Det blir ingen tiltale for å ha teke livet av ein alvorleg sjuk nyfødd. Det blir ikkje reist drapssak.

Groningen-protokollen. Verhagen og Universitetsklinikken i Groningen har skapt bølgjer i striden om hollandsk dødshjelp: Han og kollegaer lanserte i 2002 «Groningen-protokollen» for aktiv dødshjelp eutanasi til alvorleg sjuke nyfødde.

Kritikarane fekk vatn på mølla: Det er eit nytt steg utforbakke å gje dødshjelp også til sjuke som ikkje kan be om det, hevda dei.

I det stille. Eutanasi for folk over 16 år, som sjølve er i stand til å be om det, har i Nederland vore godteke sidan 1985 og lovfesta sidan 2002. Verhagen hevdar at det ved fleire sjuke- hus og i fleire land skjer aktiv dødshjelp på spedbarn, men då i det stille.

– Det er ingen god ide å avslutte eit liv. Men dersom du meiner at det å avslutte eit liv nokon gong står over at livet er heilagt, må du vere absolutt klar på motiva og vere villig til at dei blir testa offentleg, slik vi har gjort, forklarar han som bakgrunn for sin handlemåte.

Varig liding. Han tenkjer på barn som vil ha varig liding utan håp om forbetring, men som ikkje er avhengige av intensivomsorg. Eit døme er alvorlege tilfelle av ryggmergsbrokk, med barn som vil ha eit plagsamt liv sjølv etter mange operasjonar.

– Alt som kan gjerast for å lindre smerte, skal gjerast. Men når både legar og foreldre saman er overtydde om at prognosen er ekstremt dårleg, kan døden vere meir human enn at livet held fram, seier Verhagen som forsvar for å gje ein dødeleg dose til slike barn.

Mørketal. Ei spørjeundersøking har vist at det kvart år skjer 15-20 tilfelle av eutanasi på nyfødde i Nederland. Men berre 22 tilfelle blei rapporterte til påtalemakta frå 1998 til 2005. Alle handla om alvorlege former for ryggmergsbrokk, som er den einaste grunnen domstolane har akseptert.

– Andre tilstandar er like fulle av liding, men desse blir ikkje rapporterte. Grunnen er at domstolane ikkje har godteke dei, kommenterer Verhagen.

Dei fire første tilfella Verhagen sjølv fortalde påtalemakta om, var alvorleg ryggmergsbrokk. Grunnen til at han måtte vente så lenge på svar om det femte tilfellet, var at det handla om ein annan diagnose.