Tydelege åtvaringar mot søskenbarnekteskap

Sjølv om Solberg-regjeringa utset avgjerda om å innføre eit forbod mot at to søskenbarn kan bli mann og kone, har barne- og likestillingsminister Solveig Horne (Frp) laga ein vegleiar som er publisert på regjeringen.no.

I Vilkår for å inngå ekteskap kjem departementet med tydelege åtvaringar mot søskenbarnekteskap:

«Det er ikke forbudt å inngå ekteskap mellom søskenbarn (fetter og kusine), men det er viktig å være oppmerksom på at dersom foreldrene er i slekt er det høyere risiko for å få barn med sykdom og medfødte misdannelser, dødfødsel, spedbarnsdød og forkortet levealder.»

LES MEIR: Ber Horne innføre forbod mot søskenbarnekteskap 

Risiko

Helsedepartementet peikar også på risikoen som følgjer av at to søskenbarn blir foreldre. I eit brev statssekretær Frode G. Hestnes (Frp) skriv til statssekretær- og partikollega i BLD, Kai-Morten Terning (Frp) peikar han på at «barn i søsken­barnekteskap har økt risiko for dødfødsel, medfødte misdannelser og spedbarnsdød, samt generelt økt dødelighet i alle aldre opp til voksen alder.» Vidare skriv han at «En oppfølgingsstudie fra 2014 viste samme resultater».

Statssekretær Hestnes viser til to rapportar frå Folkehelseinstituttet (FHI) som er publiserte i 2007 og 2014.

Registrerer

Norge er åleine om å gjere systematisk registreringar av inngifte i befolkninga, og dermed også det einaste landet der ein kan gjennomføre slike studium av inngifte. Medisinsk fødselsregister (MFR) er ein del av Folkehelseinstituttet. MFR registrerer slektskapen mellom foreldre for alle barn som blir fødde i Norge.

I 2014-rapporten melder FHI at «inngifte forekommer sjelden blant majoritetsbefolkningen i Norge, men er utbredt blant enkelte minoriteter, spesielt blant personer med opprinnelse i Pakistan, Tyrkia og Marokko». Vidare fortel rapporten at «andelene synker blant norskfødte med innvandrerforeldre fra disse landende. Blant de norskfødte er andelene litt høyere når far er født i Norge enn når mor er født i Norge».

Trygd

I neste kartlegging ønskjer FHI å koble fleire
register for å sjå på konsekvensar av inngifte opp mot skuleprestasjonar og fråfall, diagnosar i kommunehelsetenesta og i spesialisthelsetenesta, trygdeytingar og dødsårsaker seinare i livet.