Nyheter

Meisterskap dreg til seg prostituerte

Store idrettsarrangement er arena for sexsal, tigging og tjuveri. Bergens-kyrkje tek opp kampen mot menneskehandel under sykkel-VM.

Før fotball-VM i Tyskland i 2006 opna tyske bordell nye tilbod i kampbyane.

Før OL i Rio de Janeiro i 2014 gjekk hjelpeorganisasjonar ut og åtvare mot barneprostitusjon.

Når sykkel-VM rullar i gong i Bergen, går både politi, kyrkje og opinionsorganisasjon ut og åtvarar mot menneskehandel i vestlandsbyen.

– I politiet kjenner vi godt til dette, i kjølvatnet av store idrettsarrangement kjem prostituerte, tiggarar og vinningskriminelle til arrangørbyen, seier politiadvokat Rudolf Christoffersen i Vest politidistrikt.

Han fortel at summen av tilreisande deltakarar og publikummarar blir ein stor marknad for bakmenn som fraktar inn særleg tre grupper ofre. Kvinner og jenter som sel sex, barn og unge som tiggar og utfører vinningskriminalitet.

LES MEIR Bekymret for «de prekære» i Europa

Samarbeid

Politiadvokaten er tilbake i Bergen etter eit opphald i Eurojust, EUs byrå for grenseoverskridande samarbeid mellom nasjonale påtalemakter. Eurojust arbeider særleg med grov, organisert kriminalitet. Norge har vore deltakar i byrået sidan 2005.

Christoffersen fortel Vårt Land at Bergens-politiet vil følgje med under sykkel-VM for å avdekkje menneskehandel.

Slavar

ILO, Den internasjonale arbeidstakarorganisasjonen, har rekna ut at rundt 19 millionar personar er ofre for utbytting av private aktørar, og at vel 4,5 millionar av desse igjen er ofre for tvungen seksuell utnytting; altså er ufrivillige sexarbeidarar.

Organisasjonen Hope for Justice kallar det «moderne slaveri». Difor ber dagleg leiar Sondre Høysæter kvarmannensen som er i Bergen for å sjå verdas beste syklistar knive om verdsmeistertitlar, også sjå seg til sides for å sjå om dei ser noko uvanleg.

– La meg vise fram eit bilete; finn du ein etnisk, norsk fireåring, åleine, grinande på eit kjøpesenter, kva gjer du då? Jau, du går til informasjonen og melder i frå, slik at barn og foreldre kan finne kvarandre. Men kva om du ser ein einsam gut på Torgallmenningen, med eit beger, tiggande etter pengar, kva gjer du då?

Politiet

– Ja, kva gjer eg då?

– Då kontaktar du politiet, for det er mest truleg snakk om organisert tigging, i mange tilfelle av bakmenn.

– Kva gjer nordmenn flest?

– Vi går oftast forbi, kanskje først og fremst fordi vi ikkje veit kva vi skal gjere med det vi ser.

– Kvifor skal eg melde til politiet?

– Fordi dei har den beste oversikten, mellom anna om omreisande kriminelle nettverk.

Kampanje

Sidan Hope for Justice, som er ein internasjonal organisasjon, etablerte seg i Norge i 2015, har han trappa opp informasjonsarbeidet for å gjere nordmenn meir medvitne på moderne slaveri og menneskehandel. Mellom tiltaka er kampanjen «Gjenkjenn tegnene på moderne slaveri».

– Vi prøver å få folk til å bry seg. Vi må slutte å tenkje at alt er politiets ansvar. Når du skjønnar at noko er gale, så skal du bry deg, seier Høysæter, og minnar om det same som politiadvokaten i Bergen; prostitusjon, tigging og vinningskriminalitet.

Hope for Justice dreg fram eit døme: Når ein butikktilsett avslører ei tenåringsjente i å stele herreparfyme og barberblad, er det truleg vis fordi ho gjer det på vegne av andre; bakmennene hennar som tvingar jenta til å selje sex til menn som skal ha litt ekstra pleie.

LES MEIR Slavenes nye venner

Førebygging

Kyrkjenettverket Salt i Bergen har budd seg på sykkel-VM. Pinseforsamlinga har ein eigen kampanje mot menneskehandel og moderne slaveri, For Freedom. Kampanjen driv førebyggjande arbeid og følgjer opp ofre for menneskehandel.

I oppkjøringa til meisterskapen i Bergen, har tilsette og frivillige i Salt vore på besøk hjå særleg reiselivs- og transportbedrifter i byen og omegn.

– Vi har informert om menneskehandel, at det truleg vis vil bli frakta trafficking-ofre til Bergen i samband med sykkel-VM - og kursa folk om kva teikn dei skal sjå etter for å avdekkje trafficking, fortel Benedicte Ekman, leiar for For Freedom.

Akkurat som politiet rettar Salt merksemda mot særleg sexsal, tigging og tjuveri. Ekman fortel at dei oppmodar folk til å vere ekstra merksame på sårbare kvinner og tenåringar som ser ut til å vere nye i byen.

Både Ekman og Høysæter i Hope for Justice rosar Bergen kommune for stor vilje til å samarbeide om førebyggjande tiltak når det kjem til menneskehandel. Mellom anna er vektarar som jobbar for kommunen kursa til å sjå etter teikn på slik handel.

Klinikk

Fordi Salt driv både førebyggjande og oppfølgjande arbeid, har dei fått kompetanse til å arbeidet med ofre for menneskehandel.

– Vi driv tre tiltak. Vi har ei omsorgsteneste med økonomisk og juridisk bistand, ei fadderteneste og ein klinikk som yter psykologhjelp, fortel Ekman.

Bakgrunnen er at menneskehandel finn stad i Bergen, også når det ikkje er store idrettsstemner i byen. Bergens-politiet ligg i front i Norge, gjennom Exit-prosjektet, med å få domfelt bakmenn som står bak menneskehandel.

Les mer om mer disse temaene:

Bjørgulv K. Bjåen

Bjørgulv K. Bjåen

Bjørgulv K. Bjåen er journalist i nyhetsavdelingen i Vårt Land.

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter