– Å boikotte israelske varer blir ei krevjande øving. Du må til dømes klare deg utan mobil- telefonen og PC-en, seier Andreas Brovig.
I eit år har han drive nettsida israelsk.no. Her viser han fram alle dei israelske varene som norske forbrukarar kan kjøpe – og må kjøpe om dei vil ha tilgong på viktige verktøy i kvardagen, som til dømes mobiltelefonen.
– Israelske teknologiselskap er i dag så langt framme og leverer så mange viktige produkt, at ein boikott vil bli svært vanskeleg, seier Brovig, som også er gruppeleiar for KrF i Lillesand bystyre.
LES OGSÅ:Prest ber om Israel-boikott
Ber om boikott
I gårsdagens Vårt Land tok sokneprest på Svalbard, Leif Magne Helgesen, til orde for full boikott av Israel:
– Tida er inne for å bruke sterkare verkemiddel mot Israel. Akkurat som verdssamfunnet pressa Sør-Afrika til å skrote apartheid-politikken, må Israel bli pressa til å avslutte okkupasjonen av Vestbreidda og gje palestinarane ein eigen stat.
Helgesen ønskjer også drahjelp frå eigen arbeidsgjevar, Den norske kyrkja:
– Kyrkjas haldning er at ein ikkje skal kjøpe israelske varar som er produserte på Vestbreidda. No er tida inne for å trappe opp boikotten, for Israel viser liten vilje til å avslutte okkupasjonen av Vestbreidda, sa Leif Magne Helgesen, og ba nordmenn slutte å kjøpe israelske varer.
Soknepresten på Svalbard var ved årsskiftet internasjonal observatør i Hebron på Vestbreidda, og er i sommar obser- vatør i den vesle palestinske landsbyen Susiya sør for Hebron.
LES OGSÅ: Biskop åpner for hardere straffetiltak mot Israel
Milionvekst
Dei seinare åra har det vore fleire oppmodingar om å boikotte israelske varer, men tal frå Statistisk sentralbyrå (SSB) viser at oppmodingane fell på steingrunn:
• I 2000 kjøpte Norge varer frå Israel for nesten 475 millionar kroner.
• I 2014 importerte vi varer for 875 millionar kroner.
Følg spalten på Facebook og Twitter!
Må snu
Få månader etter at dåverande SV-leiar Kristin Halvorsen blei finansminister i den raudgrøne regjeringa i 2005, gjekk ho ut og oppmoda til boikott av israelske varer. Israel reagerte sterkt på at eit norsk regjeringsmedlem ba om boikott – og allereie dagen etter at orda fall, beklage Halvorsen boikottoppmodinga.
Eit år tidlegare reagerte SV sterkt då det kom for ein dag at appelsinane som var sette fram på landsmøtehotellet i Kristiansand, var israelske. Då ein delegat oppdaga eit Jaffa-merke på dei gule båtane, måtte hotellet bere ut fruktfata og kjøpe inn nye appelsinar til SV, som boikottar israelske varer.
LES OGSÅ: Mot sin hensikt
Sterkare oppslutning
SSB-tala for 2013 og 2014 viser at sjølv om importen frå Israel til Norge veks, er dei ei varegruppe som går ned; frukt og grønt. Denne reduksjonen, som er på 8 millionar, blir kompensert av sterk importvekst av andre vareslag, særleg teknologi.
– For dei som ivrar for boikott kan det vere enkelt å slutte å kjøpe israelsk frukt og grønt, slik som Jaffa-appelsinar, seier Andreas Brovig.
– Har ditt arbeid med israelsk.no påverka handelen med israelske varer?
– Det vil eg vere varsam med å seie noko om. Men på generelt grunnlag vil eg seie at for oss som er Israel-vener, er det lettare å få oppslutning om oppmodingar om å kjøpe israelske varer enn det er for dei som ønskjer boikott og få oppslutning om ei slik opmoding, seier Brovig.
Forsvarssal
På eitt område har Norge slutta å kjøpe israelske varer. Forsvaret kjøper ikkje militært materiell frå Israel lenger – og norske forsvarsbedrifter får ikkje selje sine produkt til Israel direkte.