Det er ikkje berre i Noreg at Frode Grytten tek eit oppgjer med asylpolitikken. Diktet hans «til orientering», om den danske «smykkelova» har fått stor merksemd her heime.
No kjem diktet også i den danske avisa Politiken – og det er omsett til engelsk.
– Det kan eg like, seier forfattaren til Vårt Land.
(Les diktet "til orientering" nederst i saka.)
Uverdig spel
Kvifor ville du dikte over asylpolitikk?
– Asylpolitikk handlar ikkje berre om ressursar, men også om korleis vi ser kvarandre. Smykkelova har til dømes inga meining i praksis, ho er berre vedtatt for å skremme asylsøkarar vekk, og for å underminere deira behov for hjelp. Dette er eit medvite spel for å dytte asylsøkarar mellom seg, og hanke inn veljarar på heimebane. Det er uverdig, og det er sjokkerande, og dette kan ikkje reduserast til debatt om eitt einskild vedtak.
Korleis har responsen vore?
– Teksten blei til som eit svar på danskane sitt vedtak om smykkelov, men verken Danmark eller danskane er nemnt, så det handlar vel om noko større enn ein lovparagraf. Eg har fått med meg at diktet er blitt mykje delt og spreidd og kommentert. Det kjem i danske Politiken, og er no omsett til engelsk. Det kan eg like, men eg har ikkje lese kommentarfelta. Sikkert ingen briljant idé å dykke ned der.
LES OGSÅ: Hørt om dansken som asyl-hatet svensken?
Diktninga er politisk
For ei tid sidan sa Jan Erik Vold til Klassekampen at norske diktarar etter Bjørneboe i lita grad hadde vore opptekne av politikk. Kva meiner du?
– Om ein tenker på politikk som noko som liknar partipolitikk eller den daglige debatten i det massemediale, så er det gjerne få tekstar som går rett inn der. Men eg tenker på litteratur som empati, som eit alternativt bilde av verda, eit motspråk, eit forsøk på å vise den andre frå innsida, vere der politikken bare står utanfor og snakkar i generelle og oftast fattige vendingar om kva menneskelivet er for noko. Slik er diktninga politisk.
Poesi sklitaklar motstandaren
Kva kan poesi seie, som til dømes eit vanleg lesarinnlegg ikkje kan seie?
– Opne opp, få oss til å sjå ting på ny, finne verda opp på ny, sklitakle motstandaren på uventa vis.
LES OGSÅ: I finanspolitikken kan eit dikt seie meir enn tusen ord.
Over til nokre av våre faste spørsmål: Kva vil du ha meir av i norsk politikk?
– Ærligheit. Statsministeren kan ikkje stå og lyge oss rett opp i trynet med å seie at terroristane brukar våpen der vi brukar ord, når vi involverer oss tungt i krigshandlingar og våpensal rundt omkring i verda.
Går i vaskekjellaren av handball
Og kva har overraska deg den siste veka?
– Det norske landslaget i handball. Kva var det som skjedde der? Plutselig blei det moro også å sjå menn hive ball til kvarandre. Men eg har ikkje så gode nerver til å sjå på handball, det er altfor spennande. Eg brukar å gå ned i vaskekjellaren når det drar seg til.
LES OGSÅ: Dei utfordra ytringsfridomen med poesi
Kva er heilagt for deg?
– Ingenting, berre livet.
Og kven skulle du helst snakka med no?
– David Bowie. Om eg kunne ha snakka med han, ville han ha vore i live, og då kunne han ha lagd fleire plater og songar. Dei siste var så gode, så fabelaktige, han skulle ha fått nokre fleire år til å lage musikk.
til orientering
vi kjem til å ta klokka di
og pengane dine
vi kjem til å ta gifteringen din
og smykket du har rundt halsen
med mindre du kjem opp med
ei aldeles tåredryppande historie
så vil vi konfiskere
øyredobbane dine og mobilen din
og datamaskina di
det er i aller beste meining
vi vil konfiskere sekken på ryggen din
og kofferten i handa di og hatten din på snei
og gåstolen din og kona di
så skal vi konfiskere gullet i plombane dine
og den frakken din som ser svindyr ut
vi kjem til å konfiskere
fiolinen din og saksofonen din
du må også bidra
sjølv om du kjem frå ingenting og har ingenting
og så kjem vi til å konfiskere
dagen din og natta di
fortida di og framtida di
minnene dine vil bli konfiskert
fotoalbum og kosebamsar vil bli konfiskert
håpet ditt og gleda di vil bli konfiskert
du vil få alt igjen om du drar herfrå friviljug
men vi må dessverre konfiskere
språket ditt og songane dine
og himmelen over deg
og havet under deg
blått skal konfiskerast
og raudt skal konfiskerast
og grønt og gult skal konfiskerast
(svart og kvitt kan du framleis ha)
så kjem vi til å konfiskere guden din
han er farlig for oss
det veit du vel
og gps-en din skal konfiskerast
og stjernene du seglar etter
båten din, vegen din, bøneropa dine
og du har kanskje tenkt:
«eg skal gå til eit trygt land,
eg skal gå over grensa til fred»
den tanken er no offisielt konfiskert
til slutt konfiskerer vi deg
vi tar huda di og håret ditt
og munnen din og kjønnsorgana dine
vi tar den eine lunga di
og begge nyrene dine
vi tar auga dine og alt du ser
og alt du føler med hjartet ditt
Inline OCA ad
hjartet ditt er forresten konfiskert
her og no
vi tar beina dine
og dit du har tenkt å gå
og når du står der naken i tjue minus
vonar vi at du forstår at vi gjør dette
til ditt eige beste og fordi vi vil deg vel
velkomen hit
spørsmål?
opp med ei hand
om du lurer på noko!
rekk opp ei hand
så kan vi få konfiskert den òg
DISKUTÉR: «Det verste er at danskene hånflirer av smykkeloven»