Sidan Høgre og Framstegspartiet blei samde om regjeringsplattforma hausten 2013, har dei blåblå ønskt å få avslutta ordninga med kyrkjeasyl. Særleg har justisminister Anders Anundsen (Frp) ivra for å få stengt kyrkjedørene for asylsøkjarar med endeleg avslag, som nektar å etterkome kravet om å reise ut av Norge.
Dei siste kyrkjeasyla blei avslutta i mars. Då gjekk asylsøkjarar ut av Rypefjord kyrkje i Finnmark og ut av pinseforsamlinga Filadelfia i Askim i Østfold.
Fekk bli
Norske gudshus var tome for kyrkjeasylantar i åtte månader. I byrjinga av november gjekk ein familie på seks, mor, far og fire barn frå Afghanistan inn i Vågsbygd kyrkje i Kristiansand og ba om kyrkjeasyl, melder Fædrelandsvennen.
Etter å ha vore ein del av miljøet rundt «Språkcafeen i Vågsbygd» og Vågsbygd kyrkjelyd, ba familien om å få bli i kyrka etter eit arrangement 3. november. Sokneprest og kyrkjelyd sa ja og orienterte biskop Stein Reinertsen i Agder og Telemark bispedømme.
Han seier til avisa at «ordningen med kirkeasyler viktig og skal være viktig»:
- Samstundes er det inga varig løysing, understrekar biskopen.
LES OGSÅ: Sist noen satt i kirkeasyl endte det med opphold
Sende brev
Ordet kyrkjeasyl er ikkje nemnt ein gong i brevet, men Justisdepartementet vona at brevet skulle ha ein bestemt effekt: Ingen fleire i kyrkjeasyl i lokalkyrkjer i Den norske kyrkja.
Brevet, som går grundig gjennom asylprosessen frå søknad til endeleg avslag, gjekk frå departementet til Kyrkjerådet i Den norske kyrkja tidlegare i haust.
Brevet gjer greie for den gode og verdige asylprosessen frå registrering til endeleg vedtak og er sendt til Den norske kyrkja, som så skal distribuere det ut til kyrkjelydane. Slik skal alle kyrkjelydar bli godt opplyste, sa statssekretær Vidar Brein-Karlsen (Frp) til Vårt Land i 31. oktober.
Tre dagar seinare sat det seks personar i kyrkjeasyl i Kristiansand.
LES MER: Regjeringen tør ikke stanse kirkeasyl - ber kirken gjøre det selv
Gammalt rundskriv
Sidan 1993 har politiet hatt forbod mot å gå inn i kyrkjer for å hente ut asylantar med endeleg avslag. I 23 år har inga regjering freista å oppheve rundskrivet dåverande justisminister Grete Faremo (Ap) sende ut. Statssekretær Brein-Karlsen opplyste til Vårt Land at politisk leiing i departementet ikkje er budd på å sende ut eit nytt rundskriv som opphevar påbodet.
Familien i Vågsbygd kyrkje har konvertert frå islam og blitt kristne. Men dei har fått endeleg avslag på asylsøknadane, og skal dermed reise frå Norge.