Mens dei politiske partia jobbar på spreng for å bli einige om korleis vi skal finne midlar til å handtere flyktningkrisa, kjem det franske dramaet Dheepan til norske kinosalar.
Filmen vann Gullpalmen i Cannes tidlegare i år, men er dessverre framleis høgaktuell, slik han stiller spørsmålet: Korleis er det å komme som flyktning til Europa?
Må vere gift
Den tidlegare tamiltigeren Jesuthasan Antonythasan spelar hovudrolla som Dheepan i filmen. Dheepan er medlem av den srilankiske geriljagruppa Tamiltigrane og kjem som flyktning til Frankrike.
LES OGSÅ: Deeyah Khan får menneskerettspris
For å få opphald, må han late som om han er familiefar: Plutseleg er han «gift» med ein kvinneleg flyktning han nesten ikkje kjenner frå før. Eit barn har han også fått ansvaret for.
Utfordrande
Dette er i seg sjølv ein utfordrande situasjon, og forholdet mellom Dheepan og «kona» utgjer ein viktig del av filmen. Likevel blir situasjon vesentleg mykje verre av at dei blir busette i ein fattig forstad til Paris, der kriminelle rår grunnen.
LES OGSÅ: Vil treffe deg i hjertet med film om hevn
Dheepan prøver så godt han kan å halde seg utanfor dei lysskye aktivitetane som går føre seg i lokalområdet, men blir etter kvart trekt inn i eit tilvere han kjenner så altfor godt frå geriljakrigføringa i heimlandet.
Den franske meisterregissøren Jacques Audiard skildrar Dheepans aukande desperasjon som flyktning til eit Europa som på langt nær er noko paradis.
Meir samfunnsaktuelt enn dette blir det neppe i år.